Donkam ban hikai ia ki MLA ban nangkren Khasi bad Garo: Conrad

U Myntri Rangbah u Conrad K. Sangma hynne ka sngi ha Iing Dorbar, ula ong ba ka long kaba donkam ban ai jinghikai ia ki paralok MLA Khasi bad Garo ba kin nang ban kren ia ka ktien Khasi bad Garo nalor ka English. Ia kane u Conrad ula ong ha ka jingkylli bynrap jong u MLA ka TMC u Mizanur Kazi uba la pynpaw ka jingsngewkhia halor ka rai ka Sorkar ban pynlong kongsan ia ka ktien Khasi bad Garo haba ki aplai ia ka kam ha ki District Selection Committee (DSC). Ula ong ba kane ka rai ba shim ka sorkar, ka long na bynta ban kyntiew ia kine ki ar tylli ki jait ktien riewlum namar kata dei ban nang ia ka ktien Khasi bad Garo.

Ula ong ba kino kino ki ba aplai kam ha DSC ki dei ban don jingtip ha kitei ki ktien khnang ban suk ban ai jingshakri sha ki paidbah.“ Kane kam dei ka eksam ha ka ban peit bniah ia ka jingthoh jingtar, hynrei ka long tang ban pyntikna ba ki dei ban nangkren ia ka ktien riewlum ban pynsuk ban ai jingshakri sha u paidbah,” ula ong. U Conrad ula ong ba ka sorkar ka la rai ruh ban pynrung ia ka jinghikai ia ka ktien Khasi bad Garo naduh mynta u snem ia ki khynnah skul ha ki Lower Primary, khnang ba kin nang ban kren bad sngewthuh ia ka Khasi bad Garo bad kane kan wanrah shuh ia ka jingialong kawei bad kan wanrah ia ka jingiatylli.

Ula pynkynmaw ruh ia u Lamphang ka Iing Dorbar, ba ha ka jingiaphylliew jingmut bad u, ula kyntu bad kan long kaba sngewtynnad lada don ki klas ia ki MLA ban ioh jinghikai tang kumba 10 sngi ne 20 sngi, ban nang ia ka ktien Khasi bad Garo. “Ki paralok MLA na khasi Hills kin nang ia ka ktien Garo bad kumjuh ki paralok MLA na Garo kin nang ia ka ktien Khasi, kan long kaba sngewtynnad bad kan long ka khubor ba bha bad kan long ruh ka jingpyni nuksa ba ngim dei ba pynbor tang ia kiwei ba kin nang, hynrei ngi ruh ngin ialam lynti na khmat ban pule ban nang ia ka ktien,” ong u Conrad.