Lap shyieng briew ki rawon na khap maw, suba ba dei uba jah 8 bnai mynshuwa

Ki rawon kiba la leit khwai doh ha ka wah Umran, ki la lap ia ki shynrong shyieng briew kiba la sahkut ha ki khap maw, ha kaba la mih ka jingsuba ba kine ki shyieng briew ki lah ban dei jong u wei u rangbah u ba la jah rngai la kumba 8 bnai eiei hadien ba u hap bad ngam jyllop ha kane ka wah Umran.

Kumban kdew, ha ka 27 tarik Naitung 2025, u wei u rangbah ba la tip kyrteng kum u Elbi Nongshli na ka shnong Umtasor u la hap bad ngam jyllop ha kane ka wah Umran katba u dang ia shongkai bad la ki paralok halor ka jingkieng kaba don ha ka dong Iewsier jong ka shnong Saiden bad naduh katei ka sngi ym shem lap dien satia hapdeng ka jingiawad da ki bor shnong, ki paidbah bad wat na ka liang ki bor jong ka State Rescue Team bad kiwei kiwei.

Katkum ka khubor ba la iohlum, la iathuh, ba mynta ka sngi, katto katne ngut ki rawon kiba la leit khwai sha katei ka wah Umran, sha ki bynta ba kham sharum ki la lap ia ki shyieng briew bad marmar la pyntip sha ki bor pulit ka Nongpoh Police Station ban pynlong ia ka jingtohkit.

Shuh shuh ruh la ioh jingtip, ba halor ka jinglap ia kitei ki shyieng briew na ki bynta jong ka wah Umran, la pyntip ruh sha ki bahaiing hasem jong u rangbah u ba la jah rngai hadien ba u la hap ha kane ka wah, watla ym pat ban pyntikna la kine ki shyieng briew ki dei ne em ki bynta jong u tei u rangbah na ka liang ki bor pulit kin pynlong ia ka jingkhmieh bniah lyngba ki DNA test bad kiwei kiwei.