Donkam ban wanrah ia ki kyndon ban iada ia ka jingshngain ki khynnah:Agatha

Ka Meghalaya State Commission for Protection of Child Rights (MSCPCR) ka la sngew donkam ban pyntreikam kyrkieh ia ki kyndon ban ai ka jinngshngain ia ki khynnah. Ka Chairperson ka Commission ka Agatha K. Sangma kala ong ba ka long kaba donkam ban wanrah ia ki kyndon kiba kyrkieh ban iada ia ka jingshngain ki khynnah. Haba kren mynta ka sngi, ka Agatha ka la ong ba ki nongpyniaid ia ki skul ki dei ban bud ia ki kyndon ka National Commission for Protection of Child Rights ha 2021. Kine ki kyndon ki kdew ia ka jinglong shngain ki jingtei, ka koit ka khiah bad ka pyrkhat pyrdaiñ ki khynnah. ” Kine ki kyndon kim dei ki jingai jingmut. Ka kashari Supreme Court ka la bthah ban pyntreikam ha ki skul ha ka ri. Kam dei shuh kaba shu jied”,la ong ka Agatha. Ka la ban jur ia ka jingdonkam ban don ka jingtei kaba shngain ia ki khynnah, ki tiar ki tar, nalor ka jingkhuid jingsuba ka painkhana bad ki jaka shet.

Ka la ong ba ka jingbym biang ki jingdonkam kala pynngiah ia ki khynnah bad kala pyllong ba kin pep skul noh. Ka la ong ruh ba ka donkam ban leh ia ka medical Check up man ka por, ka jingai Tika bad ka dawai ban pynduh ia u wieh ha ki khynnah. “Donkam ban pynthikna ia ki khynnah ha kaba iadei bad ka jingshah pyndik ha kiba kham heh bad ban don ka Committee ban tehlakam ia ka jingshah pyndik ki khynnah ha ki jaka pule,” ka la ong. Ka la ong ba ki nonghikai ki dei ban long kiba phikir bad peitngor ia ki khynnah ban pynthikna ba kin lait na kano kano ka jingshah pyndik.

Shuh shuh kala ong ba ki khynnah ki dei ban ioh ia ka jinghikai kumno ban iada haba ki iakynduh ia ka bor ka mariang kum ka jingkhie u jumai bad kiwei. Ha kajuh ka por, ka la iaroh ia ka kam ba la trei da ka kynhun Faith Foundation bad ka ka la kyntu ia kiwe ruh ba kin ai ka jingiatrielang .Ka Agatha ka la pynkynmaw ruh halor ki kyndon haba iadei bad ka hok pule puthi bad ban iada ia ki kynnah na kino kino ki kam shah thombor.