Donkam iatreilang ka Meghalaya bad Assam ban pynkhuid ia ka lyer jaboh ha Byrnihat

U Myntri ka Sorkar Jylla Bah Sosthenes Sohtun hynne ka sngi ula ong, ba ka long kaba donkam eh ban don ka jingiatreilang hapdeng ka jylla Meghalaya bad Assam ban weng ia ka jingeh na ka jingjaboh ka lyer ha ki thain Byrnihat, Ri-bhoi District. U Bah Sosthenes uba long ruh u MLA ka Jirang Constituency, Ri Bhoi District ula ong, ba man la ka por u ju pynpaw ia ka jingsngewkhia halor ka jingjaboh ka lyer ha ka thain Byrnihat namar ka jingpynmih ki karkhana kiba don ha katei ka thain kata ha ka bynta jong ka jylla Assam bad Meghalaya.

Ula iathuh ba bun ki karkhana kila shah khang khyrdep, hynrei ka long pat kaba kongsan ia ka sorkar Meghalaya bad Assam ban ïatreilang ban weng ïa kane ka jingeh kaba mad da ki paidbah kiba sah ha katei ka thain khappud. “Ka jingjaboh kaba mih kam dei tang na Meghalaya. Ngi don ki jaka ha ki thaiñ khapppud ba marjan bad ka Assam bad ngim lah ban ong, ba ka jingjaboh kaba mih ka dei tang na ka jylla Meghalaya” ong u Myntri Sorkar bad ka banjur ia ka jingdonkam ka sorkar Meghalaya bad Assam ban ia jurip lang ban ban thaw ia ki lad ki lynti ban weng ia katei ka jingjaboh.

U Bah Sostheness ula ong ba lada kam don ka jingwad bniah lang hapdeng ka Meghalaya bad Assam bad katba ym pat don da ka Plan kaba biang kaban pynduna ïa ka jingjaboh, kan long kaba eh ban weng ïa kane ka mat ha ka thaiñ Byrnihat. Ula pynthikna ba ka Meghalaya State Pollution Control Board (MSPCB) kala shim ia ki sienjam kiba tyngeh ia ki karkhana kiba pynmih ia ka lyer jakhlia bad kiba pynkheiñ iaki kyndon ain.