Donkam kyrkieh ïa ki aiñ ban ïada na ka jingwan buhai shnong ki bar Jylla : Dr. Batskhem

U Nongaiktien ka Liang Pyrshah ka Voice of the People Party (VPP) u Dr Batskhem Myrboh u la ong ba watla ka Jylla Meghalaya ka donkam kyrkieh ïa ki jingtei ba donkam (Infrastructure) kum ka lynti Rel na ka bynta ka roi ka par hynrei kaba kongsan ka long baka Jylla ka donkam ia ki aiñ ba khlaiñ ban tehlakam ia ka jingwan buhai shnong ki bar Jylla ban iada ïa ki riewlum kiba rit paid. “Ha kaba ia dei bad ka lynti Rel, ka Meghalaya ka donkam ha ryngkat bad ki jingtei ba kongsan (Infrastructure) na ka bynta ka roi ka par.

Phi la iohi lypa ia kaei kaba la jia haba ka kynhun ki nongpyniaid kali Tourist ki la iakhih ban pyrshah ia ka jingtuid jong ki kali Tourist na Assam hangne, kumno ki kynhun pyniaid kali Tourist na Assam ki jubab kylla. Kumta ngi donkam ia ka lynti Rel ka nuksa phi lah ban ia nujor bad ka Jylla Mizoram kaba sakhi ka jingwan tuid ki nongwanshang pyrthei hadien ba pyntreikam iaka lynti Rel” la ong u Dr Batskhem.

U Dr Batskhem u la bynrap ba ka jingkiew jong ka kam jngohkai pyrthei ka pynpaw ia ka jingdonkam kaba arliang jong ka jingdon ki jingtei ba kongsan (Infrastructure) kum ka lynti Rel na ka bynta ka roi ka par bad ka jingdon ki aiñ ban iada naka jingwan buhai shnong beain ki bar Jylla.U la ong ba ka Jylla Meghalaya ka donkam iaki ain ba khlain namar ki trai ri trai muluk, bad ki riewlum jong ka ri Meghalaya ki long kiba rit paid.

Hynrei, haba pynpaw ia ka jingbym iahap, u Dr Batskhem u la ong “Ka jingeh ka long haba ngi la dep pdiang iaka lynti Rel ha Garo Hills bad lada ki briew (bar Jylla) kwah shisha ban wan lyngba ka Rel sha Khasi Hills, ki lah ban wan lyngba ka Garo Hills. Kane ka dei ka jingsngewkhia bad ka jingeh kaba ngi donkam ban weng haba iadei bad ka lynti Rel”.