Duh nong ki trai shnong ba wan ki nongkhaii syiar na shabar Jylla: MPFWA

Ka Seng ki nongri syiar ha ka jylla lyngba ka shatri jong ka Meghalaya Poultry Farmer & Welfare Association (MPF&WA) ki la pynpaw ia ka jingsngewkhia kaba jur halor shibun ki jingeh ba la hap ban mad da ki nongrep ri syiar ha ka jylla bad ban kyntu ruh ia ki bor ka sorkar jylla ban phaikhmat ban weng ia kine ki jingeh. Kumba la pynpaw da u Bah Daminot Sylliang, President ka kynhun ki nongri syiar u la pynpaw ba ka jingeh kaba khraw ba kum ka kynhun ki la hap ban mad ka dei namar ka jingioh rung kynthlep ki nongshalan ia ki syiar shapoh ka jylla Meghalaya kaba khlem da don ia kino kino ki kyndon khamtam kiba la khniot ruh ia ka dor ka mur ha ki iew ki hat kaba la pynduhnong shikatdei ia ki nongri syiar ha kane ka jylla.

U la pynpaw ruh, ba kum ka kynhun ki nongri syiar, ki don ia ka jingsngewkhia kaba khraw ba ki bor ka sorkar jylla kam shem la thaw satia ia kino kino ki thong ban kyntiew ia ka kam ri syiar kiban iarap ruh ia ki nongrep kiba ju im jakpoh na ka kam ri syiar lane kita ki Mission bapher bapher ba la seng na bynta kiwei ki para nongrep kiba trei da kiwei ki jait kam. “Ngi dap da ka jingsngewkhia kaba khraw, ban sakhi ba da ki spah ngut ki nongri syiar kiba im jakpoh na kane ka kam, ki la nang hiar katba nang mih ki sngi wat kito kiba la ri kham bun ia ki syiar tang namar ka jinghiar dor ka doh syiar ha ka jylla kaba la jia ruh na ka jingwan poi ki syiar nabar jylla khlem da don ka jingtehlakam na ki bor ba dei peit jong ka sorkar jylla”, pynpaw u Bah Sylliang.

Halor kine ki jingeh, ban tehlakam ia ka jingrung kynthlep ki syiar nabar jylla khlem da tehlakam ia ki, ka MPFWA ka la dawa na ki bor ka sorkar jylla ba ka dei ban peit pyrman bad ban khanglad ia ka jingwan rung jong ki syiar kiba nabar ka jylla bad ruh da kaba buh ne ot khajna noh ia kito ki syiar kiba wan nabar khnang ba jingpyniaid iew kan nym long kaba laitlan bad ban pynim ruh ia ki trai ri trai muluk kiba im jakpoh na kane ka kam rep.