“Ha Nongthymmai ki don palat 10 hajar ki nongthep vote ki bym dei Khasi”

Hynriew ngut ki kyrtong hynne ka sngi ki la thep kyrteng ban iakhun ilekshon MDC ha Khasi Hills Autonomous District Council (KHADC) ka ban long ha ka 21 tarik Rymphang, 2025. Ki kyrtong ki kynthup 2 ngut na ka United Democratic Party (UDP) u Bah Gilbert Laloo na Mylliem constituency, u Bah James Ban Basaiawmoit na Mawkhar-Pynthorumkhrah, u Bah Allan Victor Lyngdoh ka Congress na Nongthymmai, u Bah Torist Syiem na ka HSPDP na Mawkynrew, u Bah Banpyrkhat Nongrang na ka Voice of The People Party (VPP) na Nongspung-Sohïong bad u Bah Seiborlang Lyngdoh Nonglait kyrtong shimet na Mawlai constituency. Haba kren sha ki lad pathai khubor u kyrtong ka UDP u Bah James Ban Basaiawmoit ula ong, ba ka mat ha kane ka ilekshon MDC ka dei ban pynkhlain ia ki ain bad ki Elaka.

U Bah James ula ong, ba hapoh District Council ka mat Elaka ka dei kaba kongsan bha namar la sakhi na ka por sha ka por ka don ka jingpynkylla Syiem bad Sordar.“Ngi donkam ban bishar bniah bad pynbha ia ki ain haba ia dei bad ka mat Elaka khnang ban pynskhem ia ka synshar khaddar” la ong u Bah James.Na ka liang u kyrtong ka Congress na Nongthymmai u Bah Allan Victor Lyngdoh u la ong ba ka thong jong u ban iakhun ilekshon MDC ka dei ban peit pyrkhing ia ka jingioh long trai ri ki briew na bar Jylla. U Bah Allan ula ai nuksa ha Nongthymmai ki don palat 10 hajar ngut ki nongthep Vote ki bym dei Khasi bad kane ka buh jingma ia ka jingkiew palat ki briew na bar Jylla kiba la ioh rung ha ka thup thep Vote.

U la bynrap ba u ïeng ha ka nongrim ban iasaid halor ka jingioh suk ki bar Jylla ia ki Trading License hapoh ka Jylla.“Bun ki kam ba heh ha ki Company shimet ne ki karkhana ai bat da ki briew ki bym dei Khasi. Ngi donkam ban pyrkhing ïa kane bad namar ki don bun ki samla Khasi kiba la lah ban shimti ia ki kam ba heh” la ong u Bah Allan. Na ka liang u Bah Torist Syiem u kyrtong ka HSPDP na Mawkynrew u la ong ba u kwah ban trei na ka bynta ka thaiñ Mawkynrew baroh kawei khamtam haba ia dei bad ka jingpynbha ia ki surok hapoh ka thaiñ.g