Ha ka jingiphuh iphieng sdang ka 10th District Level Industrial Exhibition, 2026 ha Mawkyrwat

Ka 10th District Level Industrial Exhibition, 2026 kaba la pynlong da ka ophis jong u General Manager ka District Commerce & Industries Centre (DCIC), South West Khasi Hills District ha Madan Balang Presbyterian, Mawkyrwat ka la sdang ha ka Sngi Ba-ar ha kaba la plie pyrda da u MLA ka Mawkyrwat, Bah Renikton L. Tongkhar bad u MLA ka Ranikor, Bah Pius Marwein ha ryngkat ka jingiadonlang jong u Deputy Commissioner ka South West Khasi Hills District, Bah B. Mawlong lem bad kiwei kwei.

Ha kane ka prokram la sakhi ruh ïa ka jingdon ki stall bapher-bapher jong ki nongseng kam seng jam na kylleng ka South West Khasi Hills District bad kumjuh na kiwei pat ki district ba kynthup ia ka Jaiñtia Hills bad Garo Hills, kiba kynthup naduh ki stall ‘jain sem’, ki tiar thain kti, ki wain, ka ngap, ki pliang ja ba la shna da ki sla, ki jingber ban pynbang ia ka jingshet, bad kiwei kiwei.

Haba ai jingkren lyngkot ha ka jingialang kum u kongsan, u MLA ka Mawkyrwat, Bah Renikton L. Tongkhar u la pynpaw ia ka jingkmen ban iohi ba bun ki nongseng kam seng jam napoh ka District bad ka Jylla ki la sdang ban mih pyrthei bad nang kiew na kawei ka por sha kawei pat. U Bah Renikton u la kitbok kitrwiang ruh ia ki nongseng kam seng jam ba kin long kiba jop bad u la pynpaw ruh ia ka jingkyrmen ba shisien ka sngi kin lah ban ai kam ai jam ia ki katto katne ngut ki samla kiba khlem kam khlem jam bad kane kan iarap ban pynduna ia ka jingeh ne ka jingkyrduh kam hapoh ka jylla.

U MLA ka Ranikor, Bah Pius Marwein u la iaroh ia ka ophis jong u General Manager ka DCIC, Mawkyrwat kaba la pynlong ia kane ka prokram kaba donkam haduh katta katta na ka bynta jong ki nongseng kam lajong ha kaba ki lah ban pyni ia ki mar ki mata jong ki, kaban iarap ruh ban pyniaid iew ia ki mar ki mata ba ki pynmih. U la ai mynsiem ruh ïa ki nongseng kam ba kin nang trei shitom watla ki hap ban iakynduh shibun ki jingeh, bad shisien ka sngi kin sa nang kiew shaphrang.