Ha ka jubili Ksiar AMKA, pynbna u MR T.50 lak ban tei Cultural Centre

Ka long shisha ka sngi ka ban sah jingkynmaw bad ka jingkmen kaba khraw ym tang ia ki nongialam ka All Meghalaya Karbi Association (AMKA), hynrei kan dei ia baroh kawei ka jaidbynriew Karbi kiba sah ha Meghalaya, ha kaba mynta ka sngi u Myntri Rangbah ka jylla u Conrad K Sangma ula pynbna ia ka song 50 lak tyngka ban tei ia ka Karbi Cultural Centre bad 5 lak tyngka ban iarap ia ka AMKA.

Ia kane ka jingpynbna, u Myntri Rangbah ka jylla u la pynpaw ha ka jingkren ka jong u ha ka jingpynhap pyrda noh ia ka jingrakhe ia ka lyngkhuh snem kaba 50 ne ka Jubilee Ksiar ka jingiaid lynti jong ka AMKA ban peit ia ka bha ka miat bad ka riti dustur, ki kolshor jong u paidbah Karbi u ba shong basah ha ka jylla Meghalaya kaba la long ha ka shnong Purduwa, Ri Bhoi District.

Ha kane ka jingpynhap pyrda ia ka jingrakhe jubili Ksiar, la wan ban sakhilang ruh da u MLA ka Nongpoh bah Mayralborn Syiem, u MLA ka Mawhati Bah Charles Marngar, Bah Isynei Hinge EM ka KHADC, Kong Rona Khymdeit MDC Nongpoh, u Avijit Kro, Deputy Chairman ka Karbi Anglong Autonomous Council, U Robert Jones Ronghang President ka AMKA lem bad kiwei kiwei ki Nongïalam ka AMKA.

Haba kren kum u kongsan u Conrad K Sangma u la pynpaw ia ka jingkmen ban ia don bynta lang ha kane ka sngi sah jingkynmaw jong ka AMKA kaba dei ka kynhun kaba peit kyrpang ia ki paid Karbi ha ka jylla Meghalaya, da kaba ai jingiaroh ruh halor ka jingiai treishitom jong ki nongialam ym tang ban shakri ia ka jaidbynriew hynrei wat ban ri sumar ruh ia la ka tynrai ka riti dustur, ka kolshor jong ka jaidbynriew Karbi.

“Ka Sorkar jylla Meghalaya, ka phaikhmat kyrpang ban kyrshan ia ki kynhun bapher bapher ha kaban pynneh pynsah ia la ka riti ka dustur, ka kolshor kaba kum ki jaidbynriew hapoh Meghalaya ki don, namar khlem ka kolshor, ka riam ka beit tynrai, ka rwai ka shad, ka put ka tem tynrai kum ki jaidbynriew kin nym don ia ka jingithuh kaba kyrpang (Identity), kumba long mynta ki jaidbynriew Khasi, Garo, Rabha, Koch, Karbi bad kiwei kiwei ki don ia la ka tynrai”, ong u Conrad K Sangma.

Kaba la pynkmen shikatdei eh ia ki nongialam ka AMKA, ka long ba ha kane ka sngi na ka liang u Conrad Sangma kum u Myntri Rangbah ka jylla, ha katei ka sngi u la kular syndon ba na ka liang ka sorkar jylla kan sa pynmang 50 lakh tyngka na ka bynta ban tei ka ka Karbi Cultural Center bad ruh ia ka song pisa ba 5 lakh tyngka naka Chief Minister Special Grant naka bynta ban kyrshan ïa ka jinglut jingsep jong ka AMKA ha ka jingrakhe ia ka jubili ksiar.

Nalor kitei ki song pisa ba la pynbna da u Myntri Rangbah ka jylla, ka AMKA ka la ioh ruh pat ban pdiang sa ia ka song pisa kaba 5 lak tyngka na u MLA ka Nongpoh Konstituensi u Bah Mayral Born Syiem, na bynta ban maramot Auditorium Hall jong kaba don ha Umwang.