Ban iarap ia ki skul ka West Jaiñtia Hills ha ka jingiadei bad ki lad ai jinghikai ba ia dei bad ka Computer, hynne ka sngi la sam haduh 200 tylli ki kor Computer sha ki 14 tylli ki skul ba don hapoh ka District ha ka jingialang ba la pynlong ha Conference Hall ka ophis treikam u Deputy Commissioner West Jaiñtia Hills. Ia kine ki Computer la thied hapoh ka PM-Khannij Kshetra Kalyan Yojna (PM-KKKY) Scheme lyngba ka pisa napoh ka District Mineral Foundation (DMF) Fund. Bad ia kine ki computer yn pyndonkam ha ki Secondary bad Higher Secondary School. U kongsan ha kane ka sngi u Wailadmiki Shylla MLA ka Jowai uba long ruh u Chairman ka MUDA, ula wan ban aiti ia kine ki Computer.
Haba kren u ong ha kane ka juk Digital ba mynta donkam ban nang pyndonkam Computer, kumta u khmih lynti ba kine baroh kin iarap ban kyntiew ia ka pule puthi bad ban pynkhreh ia ki khynnah na ka bynta ka lawei jong ki.Ula pynshlur ruh ia ki nonghikai skul ba kin wan shakhmat lada don kano kano ka jingduna ba ki lap khang ban lah iarap ia ki. Na ka liang u Deputy Commissioner, u Abhinav Kumar Singh u iathuh ba yn sa pynlong ruh iaki Certificate Course jong ka Microsoft hadien kum shibynta ka Second Phase ha kaba yn jied uwei naki nonghikai na kawei ka skul.Kane dei kawei ka thong ban pynshlur iaki khynnah ban pule iaka line Computer namar ba duna kiba jied iaka course Computer Science hapoh ka District.
Ki skul ba la ioh ia kine ki Computer dei ka Sohkha Government Higher Secondary School kaba la ioh 17 tylli, ka Government Boys’ Higher Secondary School, Jowai kaba la ioh 23 tylli, ka Kiang Nangbah Government Higher Secondary School, 26 tylli, ka Government Girls’ Higher Secondary School, Jowai 20 tylli, ka Jowai Public School Jowai bad ka Government UPS Mowkaiaw & RMSA kiba ioh mar 13 tylli. Kiwei pat ki skul dei ka Shangpung RMSA Secondary School, ka Jowai RMSA Secondary Schoool, ka Government Senior Basic & RMSA, ka Higher Secondary School Mynso bad ka Nongtalang Government Secondary School kiba la ioh mar 12 tylli. Nangta pat ka Shkenpyrsit UP SSA & RMSA Secondary School, ka Mustem SSA UP & RMSA Secondary School, ka Barato Government UP & RMSA Secondary School bad ka Trangblang Government UP & RMSA Secondary School kiba la ioh mar 10 tylli ki Computer.