Ha ka Save Jaiñtia Mission ka JNC, dawa ban pynkhlain ia ka JHADC

Ka Jaiñtia National Council, Central Executive Body hynne ka sngi ka 15/01/2025 ka la sdang ban leit ialap paidbah halor ka Save Jaiñtia Mission kaba la saiñ dur da ma ka hi, bad ia kane ka jingialap ka la sdang na Iawmusiang Jowai lyngba ka jingwan kyrshan lang kiwei pat ki kynhun sengbhalang ba kynthup ka JSU, JSM bad kiwei. Lyngba kane ka Save Jaiñtia Mission ka seng ka dawa ban pynkhlaiñ bor ia ka JHADC kumba la pynkupbor da ka aiñ jong ka 6th Schedule khnang ba ki riti dustur ruh kin neh kin sah. Ban pynrung ia ka ktien Jaiñtia (Pnar) ha ka State Anthem bad  ha ka State language Act.

Nangta ban shna ia ka policy thung kam ha ki kharkhana pynmih khyndew bilat khnang ban myntoi ki khun samla trai ri trai muluk. Ban pynbeit ia u pud u sam hapdeng ka Jaiñtia bad Assam da kaba pynshong nongrim ia ka PRE 1951 jong ka Map Jaiñtia Hills. Bad ruh ban shna noh da ka small sale coal mining policy khnang ban ioh bynta lang u rit u ria ha ka kam trei dewiong, ym kumba long mynta ha ka jingpyrshang plie dewiong ka sorkar lah ban trei tang kiba don ia ka jaka baheh.

Kiba ai jingkren ha kane ka sngi, kynthup u Hame Bamon President JNC Western Zone, u Nangjan Dkhar Vice President JNC-CEC, u Neil Mukhim acting GS JSU, u Heihok Supooh President JSM Western Region, u Mehi Rymbai Arts and Culture Secretary JNC CEC, u Wanshwa Suting General Secretary JNC-CEC bad u  Sambormi Lyngdoh President JNC CEC, ki ong ha ka jingiadei bad ka jingioh lad ban wan thyllep ki bar Jylla sha Rilum Jaiñtia na ka bynta ban kamai kajih bad seng ki kharkhana baheh ka daw dei ba tlot treikam ka district council. Ia kane ka jingleit ialap kin dang bteng ruh ha ki jaka bapher bapher ka Rilum Jaiñtia.