Hiar u Symbud Myntri Rangbah, CEM bad ki MDC sha Lapangap

Hadien bala mih biang ka jingiakynad  hapdeng ki jaitbynriew Pnar bad Karbi la kumba shibnai ei ei ha shnong Lapangap, West Jaiñtia Hills District, hynne ka sngi u Symbud Myntri ryngbah ka sorkar Jylla u Sñiawbhalang Dhar uba dei ruh u MLA ka thaiñ ula hiar leit jurip sha shnong Lapangap, West Jaiñtia Hills ryngkat ka jingdonlang ki MDC ka JHADC kynthup ia u CEM, JHADC u Thombor Shiwat, u Dy. CEM u Lasky Rymbai bad kiwei, nangta u Waheh shnong ka Lapangap, u Deibormi Lyngdoh, u Waheh shnong  Khanduli u Yooshida Nongspung bad kiwei. Na ka liang ki bor district la donlang u DC ka West Jaiñtia Hills, u Abhinav Kumar Singh, u SP, u JS Dhonoa bad kiwei ki sahep sorkar.

Ha kane ka jinghiar jurip u Sñiawbhalang ula leit peit iaki lyngkha rep ki jaitbynriew Pnar ha Lapangap kiba don hajan ka ktem shong ba shipor ki pulit Assam ha kaba ula iakren bad ki waheh shnong, ki nongrep bad kiwei. Ha ka jingialang bala pynlong ha madan ka Lapangap ula pynsngew sha ki paidbah ba ka jingthmu ka sorkar ka long ban iada iaki paidbah ka shnong Lapangap kaba dang hap hapoh ka Nartiang Constituency. Ula kyntu ruh ia ki nongshong shnong ba kin  pynbiang iaki kot sla khnang ban suk ka jingia pynbeit pud  ynda wanrah iakren  hapoh ka Regional Committee.

U ong ruh ba donkam ban don ka shongsuk shongsaiñ khnang ba ki briew kin lait naka jingduh mynsiem. Bad lada donkam ban pynjem shisien ruh ka biang hi namar kiba don na kawei pat ka liang maki ruh ki hap hi ban pynjem da kaba u ai nuksa ba hadien ka jingiakren phone jong u bad kiba  na Assam kila sdang ban kyrriah. U iathuh ruh ba un sa iakren bad u Myntri Ryngbah duh, u Conrad Sangma halor kumno ban iada bad ban  wanrah biang iaka jingshongsuk  ki nongrep bad ki paidbah ka thaaiñ khappood.