Ha ka sngi ap miet Snem Thymmai, yn pynlynguh ka kynhun ‘Blue’ ha nongbah Shillong

Ka kynhun tem ki shynrang ne ‘Boy Band’ kaba pawnam ha ka pyrthei ka ‘Blue’ ka la pynbna ba kan wan ban pynshongshit ia ki paidbah ka nongbah Shillong haka miet jong ka 31 tarik u Nohprah. Ka Blue kala pynbna ha ka Instagram ka jongka @officialblue da kaba thoh “Ngin don ha Shillong, India ha ka 31 tarik u Nohprah ha ka jingrakhe kaba kyrpang ia u Snem Thymmai”. Ia katei ka Concert yn pynlong da ka Fukra Entertainment bad ka insider.in hynrei haduh mynta kam pat don satia kano kano ka jingpynbna halor ka jingdie ia ki tiket naka bynta ki nongpeitkai.

Ka Blue kan wan ban pynshongshit ia ki paidbah ha ka sngi peit miet ban pdiang sngewbha ia u snem bathymmai ha kaba kan rwai ia ki jingrwai kiba pawnam ki jongka ha katei ka Concert. Ki jingrwai kiba pawnam jong ka Blue ki kynthup ia ka One Love, All Rise, Too Close, If You Come Back, ka Fly By II, ka jingrwai “Sorry Seems to Be the Hardest Word,” kaba ka Blue kala ia rwai lang bad u Elton John. Ki jingrwai bad ki jingtem jong ka Blue kidei kiba la pynshohbiej bad pynshongshit naduh kiba dang rit haduh kiba la heh ha ka rta bad ha ki snem ba ka kynhun Blue kala pawnam bha bun kila ia rwai bad ia shad da ki jingrwai ki jongka.

Ki dkhot jong ka Blueki shynrang ki kynthup ia u Simon Webbe, Duncan James, Lee Ryan bad u Antony Costa bad kane ka kynhun kala ioh ruh ban khur ia bun tylli ki khusnam.