Ai jingiarap ka sorkar ia ki briew ba don jingduna dkhot met

Ka Tnad Social Welfare ryngkat ka jingiatreilang bad ka State Resource Centre on Disability Affairs, hynne ka sngi ki la pynlong ia ka“EMPOWERFEST 2.0” ka jingrakhe ia ka International Day of Persons with Disabilities 2024 kaba la pynlong ha Soso Tham Auditorium, Shillong. Ha kane ka jingrakhe ia ka sngi kiba duna ha ki dkhot met, u Lat ka jylla u CH Vijayashankar kum u Kongsan ryngkat bad u Myntri ka Tnad Social Welfare u Bah Paul Lyngdoh, ki la sam ia ki shuki ba la shna kyrpang sha ki briew kiba don jingduna dkhot met. Haba ai jingkren, u Lat ka jylla ula iaroh ia ka jingtrei shitom ban pynmih ia ka buit treikam ‘Adaptive Seating Initiative’ ha kaba la shna kyrpang ia ki shuki bad la ai sngewbha sha ki briew ba don jingduna ha ka dkhot met kaba dei ka sienjam jong ka jingiatreilang hapdeng jong ka Commissioner for Persons with Disabilities, ka Meghalaya State Skill Development Society bad ka State Resource Centre on Disability Affairs.

U Lat ula ban jur ia ka jingkongsan ban weng ia ki jingeh kiba duna dkhot met ha ka imlang sahlang ban pynthikna ba ki briew kiba don jingduna dkhot met kin lah ban pynurlong ia ka jingangnud jong ki. Ha kane ka jingrakhe la sdang ruh ia ka Meghalaya Sign Bank App kaba lai bad la sam ia ki shuki kiba kyrpang ba ka jylla Meghalaya ka ia leh ban pynbiang ia ka lad pyniasoh bad ka jingpyndonkam ia ki kor teknoloji na ka bynta ki briew kiba don jingduna ha ka dkhot met bad la pynlong ia kane ka jingrakhe ban pyni ia ka jingtrei shitom na ka bynta ka imlang sahlang ha baroh ki liang.

Ha kane ka sngi la pynkup burom ruh ia ki nongjop ha ki jingiakob ha ka EMPOWERFEST 2.0 kiba don ka sap ka phong bad ia ka jingnoh synniang bad la  pynkup burom ruh ia u Lat ka jylla bad ia kiwei ki heh ki haiñ. La pynphuh pynphieng ia ka jingrakhe da ka kynhun tem Eastern Brook Band kaba la rwai ia ka Meghalaya Disability Anthem, kaba la pynhun mynsiem ia baroh kiba la wan ban iashim bynta ha ka jingrakhe.