Ha ka Special Cover bad Pictorial Cancellation buhnam ka India Post Ophis ia U Kiang Nangbah Khlawait ka Jaintia

Ka long ka sngi ban sah kynmaw ia ki khun ka Rilum Jaiñtia namar ba ka India Post ka la pynlait ia ka Permanent Pictorial Cancellation jong u Mot sahnam U who Kiang Nangbah khlawait ka Rilum Jaiñtia (Kiang Nangbah Monument) bad ka Special Cover U Kiang Nangbah. Ki Special Cover dei ki kynja envelope ba don ka dur U Kiang Nangbah kumjuh ruh ki jingthoh ia ka khana lyngkot jong u ha ka ktien Khasi, English bad Hindi, katba ka Pictorial Cancellation pat dei ka shap (seal) ba don ka dur mot sahnam u Kiang Nangbah kaba ha Syntu Ksiar kiba la ithuh da ka sorkar India.  Ia kine la pyllait paidbah ha ka jingialang ba la pynlong ha ka sngi saitjaiñ ha Kiang Nangbah College, Jowai da u MLA ka Jowai, u Wailadmiki Shylla uba la long kum u kongsan ha ka jingdonlang u CEM ka JHADC, u Thombor Shiwat, u Director of Postal Services (HQ) North East Circle, u KVL Murty, u Dolloi ka Elaka Jowai, u Puramon Kynjing, ka Anjali Verma Senior Superintendent of Post Office kaba dei khmih hapoh Meghalaya nalor kiwei pat.

U KVL Murty u ong ba ka jingpyllait ia kine ki Pictorial Cancellation ka long ban tip ka pyrthei shaphang u Kiang Nangbah bad da ka jingiakhun jong u ngi sa ioh iaka jinglaitluid. U ong ruh ba ka thaiñ mihngi ka long donbok bha namar ba ka pynmih shibun ngut ki riew shlur bad khraw pyrkhat kiba la shakri ia ka Ri.  U Wailadmiki Shylla haba kren ula ai khublei ia ka India Post halor ka jingithuh jong ka ia u khlawait ka Ri da kaba pynlait ia kane ka Permanent Pictorial Cancellation U Kiang Nangbah kumjuh ia ka Special Cover. U ong ba watla dei ka jingialang barit ruh hynrei kaba donkam bha pat namar lah ban ioh tang shisien, bad kine ki Envelop ki dur ba don ruh ka khana lyngkot u Kiang Nangbah kin leit sha kylleng ka pyrthei.

Shuh shuh u ong ba ngi ka pateng mynta ngim da sngewthuh than ia ka jingkordor ka jinglaitluid, namar ia ngi la kha laitluid lypa. Kumta u kyntu ban bud ia ka jingialam lynti u Kiang Nangbah. U Wailadmiki u kyntu ruh ia ka tnat India Post ba kan plie lad na ka bynta ban ai kam ai jam ia ki khun samla ka thaiñ hapoh kane ka tnat namar dei ki samla ba stet ban kem jingtip bad ba iaishah. Ha kane ka sngi u Principal ka College uba dei ruh u President ka Seiñraij Jowai, u H. Toi haba iathuh ia ka khana u Kiang Nangbah u ong ruh ba kane ka sngi dei shisha ka sngi ban sah kynmaw.