Ha Mairang Presbyterian kolej pynlong Ka TRAI Ïa ka Consumer Outreach Programme

Kawei na ki jingthmu ba kongsan jong ka Telecom Regulatory Authority of India (TRAI) ka long ban iada ia ki jingmyntoi jong ki nongthied bad ban ai ka jinghikai ia ki nongthied. Kum shi bynta ban pynurlong ïa kane ka jingthmu, ka TRAI na ka Regional Office kaba don ha Kolkata haka 19 tarik u Jylliew, 2025 kala pynlong ïa ka Consumer Outreach Programme ban pyntip sha ki paidbah shaphang ki sienjam kibapher bapher ba ka TRAI kala shim ban ïada ïa ki jingmyntoi jong ki nongthied nongpet. Ha kane ka program bala pynlong haka Mairang Presbyterian Science College u Jaipal Singh Tomar, Deputy Director General (Rural), NE. LSA, Department of Telecom u la wan ban long kum u kongsan haka jingiadonlang u Dr.R Thangkhiew, Principal Mairang Presbyterian Science College kum u symbud kongsan, u bah L. Marthong, ADC ka Eastern West Khasi Hills District kum u special quest, u Dr.Boldness L.Nongum Princiapal ka 14-8 college Mairang, u Amit Ghosal, Joint Advisor jong ka TRAI, u Nilay Dutta, Senior Research officer ka TRAI nalor kiwei kiwei kiba la shah khot sngewbha

Haba ai ka jingkren ha kane ka sngi kum u kongsan, u Tomar u la ïaroh ïa ka jingpyrshang ka TRAI ban shimkhia ban pynlong ïa kum kane ka prokram pynsngewthuh na ka bynta ka jingmyntoi jong ki paidbah kiba pyndonkam iaka telecom hapoh ka District. U la pynshai ruh halor ka jingkyntiew ïa ka telecom network ha ka jylla Meghalaya khamtam sha ki thaiñ nongkyndong bad ka jingdonkam ban nang pynbha shuh ïa ka network connection hapoh ka District ha ki snem ki ban wan. U Dr. R Thangkhiew, Principal ka College u la ai khublei ïa ka TRAI kaba la pynlong ïa kane ka prokram bad u la kyntu ïa ki samla pule ka kolej ba kin kheit ïa u soh na ka. U bah L. Marthong, u la pynpaw ia ka jingdonkam ban pynbha shuh shuh ia ka telecom connectivity hapoh ka district bad ka jingpynsngewthuh paidbah kaba man ka por halor ki kam thok ban buh tower, halor ka radiation bad ha kaba iadei bad ki kam thok kiba wan lyngba ki mobile phone.

 Ha kane ka prokram, lyngba ka jingpyni bniah da u Nilay Dutta, u ophisar wadbniah ba rangbah jong ka TRAI, la hikai ïa ki nongïashim bynta shaphang ka Value Added Services (VAS), Unsolicited Commercial Communications (UCC), Mobile Number Portability (MNP), Complaint Redressal Mechanism, Data services and Tariff nalor kiwei kiwei. La pyntip ruh sha ki nongïashim bynta shaphang ki jingmyntoi jong ki Mobile apps (TRAI MySpeed app, TRAI DND 3.0 app bad TRAI Mycall app), ka Tariff portal bad ka Network coverage map ba la shna da ka TRAI na ka bynta ban pynkup bor ïa ki nongthied bad kumno ki nongthied ki lah ban shim kabu na kine ki apps/portal. La ai jingtip ruh ia ki nongiashim bynta shaphang ki jingai jingmut bapher bapher ba la ai da ka TRAI ban pynsuk ia ka jingroi jong ka jingpyniadei bad shaphang ki kyndon thymmai jong ka TRAI ne ki Jingbthah halor ka UCC bad kumno ki dei ban long kiba husiar shaphang ki jingleh thok bapher bapher ha ka telecom kum ka jingleh thok ha ki tower, ki khubor thok bad kiwei kiwei. Hadien ba ladep ban ai jinghikai, ki nongïashim bynta kila buh jingkylli halor ki bynta ba ki ïa kynduh bad shem haba ki pyndonkam iaka telecom bad ka kynhun TRAI bad ka TSPs kila ai iaka jubab.