Ha ryngkat ki kynhun Balang bapher rakhe Pre-Christmas u Bah Sanbor

U MLA ka South Shil-long constituency u Bah Sanbor Shullai ha ryngkat ka Monitoring cum Implementation Committee jong ka South Shillong kila pynlong iaka jingrakhe Pre-Christmas ha State Convention Centre. Ha kane ka sngi la donlang ruh ki nong-mihkhmat na ki kynhun Balang bapher bapher kiba la iashim bynta ha ki jingduwai bad ki jingrwai Christmas. Kum ka jingpynkhreh ia ka lehniam Christmas, u MLA u Bah Sanbor Shullai u la ai jingiarap pisa ba u la pynlang na ka tulop lajong sha ki kynhun Balang bapher bapher kiba don hapoh ka jylli jong ka South Shillong Constituency.

Haba kren ha kane ka sngi, u Bah Sanbor Shullai u la ong “Kane ka jingiarap pisa sha ki Balang ka dei kaba nga la pynlang T.6 lak tang na ka tulop lajong. Ka jingiarap pisa ka long ban kyrshan ia ki kynhun Balang ba kin lah ban leh ia kino kino ki kam kiba iadei bad ka jingrakhe ia ka Christmas ha kane ka aiom bad ba kin dup lah ban ai jingiarap ia kiba duk ba suk kiba donkam kyrkieh ha kum kane ka por”. U Bah Sanbor u a ong ruh ba kum u nongmihkhmat bad kum u kpa jong ka Constituency u angnud ban leh bha ia baroh ki kynhun kiba don hapoh ka jylli jong ka Constituency khlem da leh shiliang khmat iano iano ruh.

Hashuwa kane u MLA ka South Shillong constituency haryngkat bad ki nongmihkhmat jong ki Balang, kila pynlong ka jingot ia u Cake Christmas ba la sam lang sha baroh kiba la wan ha kane ka janmiet.