Ha Tura, Jowai bad Shillong yn pynlong ia ka Audition Miss Universe Meghalaya

Ki nongpyniaid ia ka jingiakob Miss Universe Meghalaya 2026 bad ka Miss Teen Meghalaya 2026, ki la pyntip ba yn sdang ban khot audition ia ki samla kiba kwah ban iashim bynta ha kitei ki jingiakob thei bhabriew . Haba kren sha ki lad pathai khubor hynne ka sngi u State Director u bah Brian N. Wallang ula pyntip ba ia ka Audition yn pyllong ha ki lai tylli ki jaka bad ka jingrejistar kan sdang naduh ka por 8 baje mynstep. Ia ka Audition ha Tura yn pyllong ha ka 7 tarik Lber, ha Jowai yn long ha ka 10 tarik Lber bad 14 tarik Lber yn pyllong ha nongbah Shillong.

Kiba lah ban shim bynta ha ka Miss Universe Meghalaya kin long 18 snem shaneng bad ia ka Miss Teen Meghalaya kiba lah ban shim bynta kin long naduh ka 13 snem haduh 19 snem ka rta.U State Director u bah Brian N. Wallang, ula ong ba ka jingpyllong ia kane ka jingiakob kan long kum kawei na ka rynsan ban nang pynkupbor shuh shuh ia ki haba iadei ba ka jingthrang jong ki.Ula ong ba kane ka jingiakob kam dei ba peit tang ia ka dur bhabriew hynrei ka long kum ka rynsan ban pynshlur ia ki samla bad ba kin don ka jingsngew skhem ha kaei kaba ki leh bad ki don.Kane ka jingiakob kan sdang hapdeng u bnai Iaiong da kaba sdang ban pynbit pynbiang bad yn sa bud sa ka jingjied ban poi haduh ka Grand Finale ka ban long ha ka 1 tarik Jymmang, 2026.

Ki nongjop na kane ka jingiakop, kin ioh ban mihkhmat ia ka jylla ha ka Miss Universe India ka ban long ha Jaipur.Ki nongiashim bynta na kylleng ki district ka jylla Meghalaya la khot sngewbha ba ki lah ban iashim bynta bad ka riam ba kidei ban phong ha katei ka sngi ba pyllong ia ka Audition, ki long kumne.Ha ka kylla ba nyngkong ne ka Round 1, ki nongiashim bynta ki hap ban phong ia ka White tank top (broad straps) bad blue denim shorts. Ha ka kylla baar ne ka Round 2, ki hap ban phong ia ka ‘Short black bodycon dress’.