Ha u 2025 yn pyrkhat thymmai ka KSU halor ka ILP, MRSSA bad ka thungkam

Ka Khasi Student Union (KSU) hynne ka sngi ka la kynmaw burom ia ka lyngkhuh sngi iap ba 162 jong u Woh Kiang Nangbah ha u Motdur ba shirynieng hakhmat ka Civil Hospital, Shillong. Haba kren ha kane ka sngi u President ka KSU u samla Lambokstarwell Marngar ula ong, ba ka KSU ha u snem thymmai kan shong pyrkhat thymmai halor bun tylli ki mat ba dang sahkut ha miej ka Sorkar Pdeng. U Samla Lambok ula ong ba ki mat jingdawa ka Jylla khamtam ka jingdawa pyntreikam ia ka Inner Liner Permit (ILP), ka jingpyntreikam ia ka MRSSA ka la shu sahkut bad khamtam ka khyrdop ha Umling Ri-bhoi district ka la kylla iingjah. U la ong na ka por sha ka por ka KSU ka la ju ïakren halor ka jingdonkam ban pyntreikam ia ka ILP, MRSSA hapoh ka Jylla khnang ban shngain ki paidbah trai ri trai muluk.

“Ka Sorkar Jylla ka dang bteng ban kam ba ka la leh ia la ka jong ka bynta ban wanrah ia ka Resolution ban pyntreikam ia ka ILP bad mynta ka shong ha ka Sorkar Pdeng ban ai jingmynjur, hynrei ka jingkylli ka mih mynta shano ka ain MRSSA ba la thaw naduh 2016” la buh jingkylli u samla Lambok. U samla Lambok ula ong, ba um banse ban kynthoh ia ka Sorkar Jylla namar ka Sorkar ka la pyrshang ban ialehkai ia ki mat jingdawa kiba donkam ban pyntreikam na ka bynta ka jinglong shngain ki trai ri trai muluk bad ka Jylla baroh kawei.“Ha u snem thymmai, ngin shim ka rukom pyrkhat ba thymmai, ngin shim ki siejam ba thymmai na ka bynta ban iai bteng ban dawa bad iakhih na ka bynta ki mat ba ka seng bad ki paidbah ka Jylla ki la buh hakhmat ka Sorkar Jylla” u la ong.

Nalor kane u president ka KSU ula ban jur ia ka jingdonkam ban wanrah ka jingkhuid ha ka thungkam thungjam.“Ha ki bnai ban wan kan sa don ka ilekshon MDC, hynrei la katta tylli ki snem ki District Council ki don hynrei ym pat ju ïohi mynno mynno ruh ba ki District Council ki thungkam da kaba khuid bad suba. Ngim pat ju ïohi ba ki pynbna paidbah ba laitkam ne interview. Nga kwah ban phah ka kyrwoh sha baroh kiba thmu ban iakhun ilekshon, shim ia ki lad lynti ba bha tam namar ki samla ruh ki don ka hok ban thep kam” u la ong.