Hadien 14 snem urlong ka Seinduli PHC, jurip u MLA Mawshynrut ryngkat ki Engineer

Hadien ka jingïaid lynti kaba la slem naduh u snem 2012, khatduh ka jingthmu ban kyntiew kyrdan ïa ka Seinduli Sub Centre sha ka PHC ka la urlong, kata hadien ba ka Sorkar Meghalaya lyngba ka tnad ka koit ka khiah ka la mynjur bad mang tyngka haduh ₹8.08 klur na ka bynta ban tei ia katei ka PHC ha Tumtum, marjan Seinduli, Mawshynrut. Ia ka jaka ban tei ia katei ka PHC la ai sngewbha da i Meiieit Lebina Kharbani ha ka jingheh kaba kumba 5 acre.

Kumta, mynta ka sngi ka 20 tarik u Lber 2026, u MLA ka Mawshynrut, u Bah Methodios Dkhar, ryngkat bad ki engineer jong ka tnad ka koit ka khiah, ki la leit jurip ïa katei kz jaka shwa ban sdang ïa ka jingtei ia katei ka PHC kynthup ruh ïa ki jaka sah jong ki doctor bad kiwei kiwei ki nongtrei.

U MLA Bah Methodios Dkhar u la pynpaw ïa ka jingkyrmen ba kane ka projek kan wanrah jingmyntoi shibun ïa ki paidbah nongshong shnong bad u la ai khublei ïa ka Sorkar jylla lyngba u Myntri Rangbah (CM) bad Myntri ka tnad ka koit ka khiah kiba la iarap ban pynurlong ia kane ka project. U khmih lynti ruh ba ia ka jingtei ia kane ka PHC yn ioh ban sdang noh shen mynta hi u bnai Lber 2026.

Katba na ka liang ki paidbah nongshong shnong ki la pynpaw ïa ka jingsngewnguh kaba khraw, da kaba kdew ruh ba kane ka projek kaba la sahkut la bun snem, mynta ka la urlong lyngba ka jingiaitrei shitom jong u MLA.

Ki la ong ba naduh 2012 la dep ban aiti ia ka jaka sha ka tnad ka koit ka khiah hynrei ka la shu sahkut kumto, hynrei ha u snem 2025, hadien ka jinglong MLA jong u Bah Methodios Dkhar, la ioh sngew ba la dep mang tyngka na ka bynta ban sha noh ia kane ka PHC bad mynta ngi la ioh ban wanlang ban jurip ia kane ka jaka hashwa ban sdang noh ia ka jingpyntrei.

Shuh shuh ki la pynpaw ba ki don haduh kumba 44 tylli ki shnong kiba hap hapoh ka Shilliang Wahblei ki ban ioh jingmyntoi lyngba katei ka PHC bad kane kan sa iarap ban nang pynbha ia ka rukom ai jingsumar sha ki paidbah.