Hadien saw sngi kynthih ba ka shnong Lawblei ka la iai bteng ban wad ia ka met jong uwei u rangbah uba la hap ha Wah Umngi, South West Khasi Hills District ki paitbah nongshong shnong mynta ka sngi ki la iohi ia kawei ka metiap kaba la per ha sla ha katei ka wah, kaba la suba jur ba ka dei jong utei u rangbah. Ki riew rangbah na shnong Lawblei ki la pyntip ba hadien ba ki la ïohi ïa katei ka metïap kaba la sah tynrah hapdeng jong ar tylli ki maw baheh, mar mar ki la pyntip sha ki pulit ka Mawkyrwat halor katei ka jingjia bad pan jingïarap ban sei ïa katei ka metïap. “Ngi la pyrshang katba lah ban wad ki lad ki lynti ban sei ïa katei ka met, hynrei ngim shym la lah ban leh eiei namar ka jingkhlain palat jong ka um bad ka jaka ruh ka long kaba ma haduh katta katta,” ong uwei u rangbah da kaba bynrap ba ki pulit ruh kim shym la lah ban leh eiei halor katei ka metiap.
Ki tyllong khubor na ki pulit ki la pyntip ba hadien ba ki la ïoh ïa ka jingtip na ki bor shnong Lawblei, na ka liang ka kynhun napoh ka Fire & Emergency Services (F&ES), Mawkyrwat ki la hiar mar mar sha katei ka jaka hynrei kim shym la lah satia ban sei ïa katei ka metiap. “Ngi la pyntip mardor ruh sha ka Search & Rescue Team (SRT), Shillong ha kaba ki la wanpoi sha Mawkyrwat hynrei kim shym la lah satia ban leit sei ia katei ka metiap namar ba la wan lap noh shwa ka miet,” ong ki pulit da kaba bynrap ba ka kynhun kan pyrshang sa lashai ka sngi ban leit sei ia katei ka metiap.
Lah ban kdew hangne ba ha ka 25 tarik u Jymmang 2025, uwei u rangbah ba 22 snem ka rta na ka shnong Lawblei, 15 KM na Mawkyrwat ha South West Khasi Hills District uba la tip kyrteng kum u Bah Sainkupar Lyngkhoi u la btuid bad hap ha Wah Umngi katba u dang tong doh na kawei ka jaka ba ki khot kum ka Shar-Shar, kaba jngai kumba 2 KM eiei na ka jingkieng Wah Umngi kaba don ha ka surokbah Mawkyrwat-Shillong.