T.6.9 klur ban kyntiew kyrdan ia ka Riangdo CHC sha ka First Referral Units

Ha ka jingpynkhlaiñ ia ka jingsam jingsumar paidbah ha ka jylla Meghalaya, ka National Health Mission (NHM) ka la mynjur ïa ka bai contract kaba kot sha ka ₹6.9 crore ban pynlong thymmai, shna bad pynbiang da ki tiar sumar ha ki Community Health Centres (CHCs) ba kongsan jong ka jylla, ban kyntiew kyrdan sha ka First Referral Units (FRUs). Katei ka bai contract la ai ha ka 27 tarik Rymphang, 2025 da u Mission Director sha ka M/s Sandor Medicaids Pvt. Ltd, kaba don ka ophis ha Banjara Hills, Hyderabad. Ka jingpynioh ïa katei ka contract ka long lyngba ka Quality and Cost Based Selection (QCBS) hapoh ka NIT No-DHS/NHM/HS/33/2024-25, kaba la pynmih ha ka 28 tarik Risaw, 2024.

Ha kane ka sienjam, ka Riangdo CHC ha West Khasi Hills District ka la shah jied ryngkat bad Namdong CHC ha West Jaintia Hills District bad Patharkhmah CHC ha Ri Bhoi District ban pynlong thymmai da ka jingïarap kaba pura. Ka jingioh contract ka kot sha ka ₹6,90,28,000 (Rupees Hynriew Klur Laiphew Lak Arphew Hynñiew Hajar), bad la bthah ia ka kompani ba ka dei ban sdang ka kam kloi kloi, bad ban bud ryntih ïa ki dur ba la mynjur bad ki tiar sumar ba dei ban pyndonkam.

 Ha ka jingkren u MLA ka Mawshynrut Constituency, Bah Methodios Dkhar, u la ong “Ngim lah ban len ba kane ka dei kawei pat ka jingjop kaba khraw ban pynurlong ïa ki jingangnud jong ki paidbah. Ka jingkyntiew ïa ka Riangdo CHC sha ka First Referral Unit kan long ka jingmyntoi kaba khraw na ka bynta kane ka thain. Ka long kaba sngewkmen ban tip ba ka Riangdo CHC ka kynthup lang ha ki lai tylli ki CHC ha ka jylla kiba la ioh ka jingmynjur na ka sorkar.”Kane ka bynta ka long ka sienjam jong ka sorkar ban pynkhlaiñ bad pyniaid beit ia ki lad jingsumar kaba kloi bad kaba lah ban pynkit sha kiwei ki hospital, khamtam eh ha ki thain nongkyndong jong ka jylla Meghalaya.