Hadien 99 snem sakhi ka Hima Sohra ia ka jingleh burom khatduh ia u Syiem katkum ka riti dustur manshwa

Hadien Khyndai phew Khyndai snem ki paidbah ka Hima Sohra ki la ioh biang sa shisien ban sakhi ia ka jingthang Syiem bad ka jingleh donburom khatduh ba la leh katkum ka riti dustur jong ki longshwa manshwa.Ia kane ka jingthang Syiem, ki paidbah ka Hima Sohra ki la ioh ban sakhi hynne ka sngi ha ka jinglehburom khatduh ia ka met jong u Paiem Freeman Sing Syiem ha madan Marai ka hima Sohra.U Paiem Freeman ula khlad ha ka 31 tarik Risaw, 2025 bad ia ka met u Syiem Sohra u Paiem Freeman Sing Syiem la pynkhuid ha ka syiem ding ha kpep thang briew ha Pomsohmen, Sohra.Ha kane ka sngi, ha shwa ban rah thang ia ka met jong u Syiem, ka Raid Mawshuit kaba leh ia ka niam iap kaba don ha ka thain Khatar shnong ka la pyllong ia ka jinglehniam leh rukom katkum ka kyrdan syiem.Haba kren halor kane, u Paiem ka Hima Sohra uba la shimti ia ka khet syiem u Paiem Maremdor Syiem, ula ong ba kane kadei ka sngi sah kynmaw ha ka histori jong ka Hima namar ba ki ioh ban pyndonburom ban thang ia ka met u Syiem hadien 99 snem.

U Paiem Maremdor ula ong, “Hadien 99 snem ba ngi la ioh biang ban pyndon burom ia u Syiem, kata da ka niam ka rukom ka riti dustur ba la buh da ki longshwa manshwa.”U Paiem ula pynpaw ba kane ka dei ka riti dustur jong ka Hima Sohra kaba la ioh ban leh ia kane ka niam thang ia u syiem ka Hima.U paiem Marremdor ula ong ba u mama jong u, u Paiem Freeman ula pynkhreh ban pyllong ia ka jingthang ia ka syiemsad hynrei katba dang pynkhreh ban leh ia kane ka niam thang, ula khlad kyndit noh bad kane kala long kaba sngewsih. Ia ka Syiemsad kaba la khlad ha u snem 1994, khlem pat pyndep ia ka jingthang syiem, kaba la kot sha ka 31 snem.

Na ka liang ka Hima kan sa shim khia ia kane ban pyndep ia ka jingleh niam thang ia ka Syiemsad ha kine ki sngi ban sa wan hadien ba la pyrkhat bad pynbeit ha ka Hima. Na ka liang u syiem thymmai ka Hima Sohra, ula pynpaw ba ka thong ba u angnud eh ka long ban pynbeit ia u pud u sam hapdeng ki shnong ki thaw, ba kin iashong  suk shong sain.