Halor ka hamsaia ïakhun na NPP, jlan bad kloi eh ban ïakren, ong u bah Paul

U Working President ka UDP u bah Paul Lyngdoh ula ong ba ha ka ilekshon, tang shi taiew ruh ka por ka long kaba jlan bad ban iakren lei sa ar snem ka dang kloi than. Ia kane ula ong haba kylli halor ka jingmih ka hamsaia ba u lah ban leit iakhun noh na ka NPP ha ka ilekshon ban sa long. “Ka don ka jingong ba ha ka shi taiew ka dei ka por kaba jlan bha ha ka politik, bad haba niew ia ki taiew haduh u 2028, ka dang long kloi palat ba un kren halor kane,” ong u bah Paul.

Halor ka jingshah weng noh jong u na ka shuki Myntri Sorkar, u bah Paul u la ong ba kam don eiei ka kam kaban iadei shimet bad u hynrei ka dei ban don ia ka nongrim ha ka rukom treikam ha ka politik, namar tang saw sngi hashwa ban bujli Myntri, ka la don ka jingrakhe ia ka sngi seng ka UDP bad kam shym la don kano kano ka jingpynpaw na ka party ba kan don ka jingiabujli shuki Myntri hapdeng ki MLA ka party.U bah Paul u la iathuh ba ha shwa kane ka jingbujli shuki Myntri, u President ka UDP u bah Metbah Lyngdoh ula kren sha ki lad pathai khubor ba kim don ia kano kano ka jingthmu ban bujli Myntri hapdeng ki MLA ka party.

Ha kajuh ka por, ula iathuh ruh ba ha ka jingialang jong ka CEC kaba dang iakynduh shen shi bnai shwa ban bujli Myntri, ki don katto katne ki dkhot kiba la kylli la kan don ka jingbujli Myntri hapdeng ki MLA ka party. Ia kane, u President ka UDP uba pyniaid ia ka CEC ula ong ba kim don ka jingthmu. Haba kylli la u sngew ba ka don ka jingshet kylla, u bah Paul ula ong ba um don kaei kaei kaban iadei bad kam shimet jong u.