Pynlong jingduwai ki samla pule NEHU na ka bynta ki arngut kiba mynsaw

Ki samla pule ka North Eastern Hill University (NEHU) ryngkat ki nonghikai hynne ka sngi ki la ialum khrui ha phyllaw jong kane ka skulbah ban pyllong ia ka jingduwai kyrpang na bynta ki arngut ki samla pule kiba dang don hapdeng ka jingshitom jur. Kine ki arngut kynthup ka samla Stephanie Shadap bad ka samla Daritngen Pohdukhei kiba pule ha kane ka skulbah mynta ki dang don hapdeng ka jingshah sumar ha Nazareth Hospital, Shillong hadien ba ki la mynsaw jur na ka jingshah tynrah ha ka kali jong uwei u nongap pahara ka NEIGHRIMS. Ha kane ka sngi, ki samla pule kane ka skulbah bad ki samla na kylleng ki jaka, da ki spah ngut ki la iamih ban shim bynta ha kane ka jingbuh jingduwai ba kyrpang na bynta ki arngut ki samla ba kin ioh noh ia ka met kaba koit ba khiah.

Haba kren ha kane ka sngi u Prof. Lakhon Kma ula pynrem jur ia u Security Guard uba la tynrah ia ki arngut ki samla pule jong kane ka skulbah. Ula ong ba kane ka jingjia ka jia namar ba une u briew u bym trei ha NEHU u wan sah hangne ha phyllaw ka skulbah namar ka jingdon ka ktem (Camp) jong ka Rangers Security & Services Organisation (RSSO). “ Lada jin lada ym don kane ka ktem sah ha kane ka phyllaw jong ka skulbah, une u briew un nym wan hangne ha skulbah bad kan nym jia kum kane ka aksiden,” ong u Prof. Kma.

Na ka liang u Prof. Kma ula dawa na kane ka skulbah ba dei ban weng noh mardor ia kane ka Camp jong ka RSSO. Ha kajuh ka por, ula dawa ruh ba dei ban don ia ki Speed breaker kiba lai ne saw phut hapoh ka phyllaw bad shabar jong kane ka skulbah, khnang ba ki kali kiba iaid kin nym pynher sted.