Hap hiar shuki u CEM GHADC Kyntait u bah Prestone ia ka jingkynnoh leh politik

U Symbud Myntri Rangbah ba khmih ia ka tnat District Council Affairs (DCA) u Bah Prestone Tynsong ula ong ba u Albinush R Marak ula hiar shuki Chief Executive Member (CEM) jong ka Garo Hills Autonmous District Council (GHADC), namar ba ula iaid lait ia ka Executive Committee (EC) bad ia ka Iingdorbar halor ka jingpynbna (Notification) ba donkam syrnot Scheduled Tribe (ST) ban iakhun ilekshon GHADC.U Bah Prestone u la kyntait halor ka jingkynnoh leh Politik da kaba ong, “Ka jinghap hiar shuki u CEM ka dei ba u iaid lait ia ka EC ym namar ki rai ba ia dei bad ka jingai tiket ka NPP”.

Haba kren sha ki lad pathai khubor u Bah Prestone  la ong “Kane ka dei kaba ju jia hi, phim lah ban ong kumta, na ba 21 ngut ki MDC ki la leit hi da lade ban iakynduh ia u Lat, kat kum ka rule, u Lat ula rai ia ka jingduh jingshaniah u CEM donkam ban pynshisha hapoh ka iingdorbar”.“Ka shuki CEM bad Chairman ka District Council ka dei kaba jied da ki dkhot ka Iing. Lada phi kwah ban weng, dei ban leh hapoh ka Iingdorbar, pynshisha ia ka jingbun paid” la ong u Bah Prestone.U Bah Prestone ula ong ba ka jinghap hiar shuki u Albinush ka dei namar ka jingleh marwei halor ka kam syrnot Scheduled Tribe na ka bynta ki kyrtong ba iakhun elekshon.

“Ula pynmih hi hala ka jong ka kyrdan halor ka syrnot ST…lehse ka lah ban dei eh hynrei kam shym la iaid pat kat kum ki kyndon bala buh. Balei ba tang ma u marwei ban soi haba ia kane dei ban wanrah hapoh ka Iingdorbar?” ula ong haba bynrap “Namar kata, 21 ngut ki MDC kila ong ba pat ibit ban iai bteng ha kane ka kam”.Halor ka jingpynduh ticket ka party, ula ong “Ka jingkyntait ne jingai ticket ka dei kaba ju jia ha man ki party. Tang namar ba ka party kam shym la ai ticket, phim lah pat ban iaid lait na ki kyndon? Phim lah satia ban leh kumta”.