Hiar jurip ka Committee Iingdorbar Thawain, lap bun ki karkhana ha Byrnihat bym siew ram

Ka Committee on Public Undertaking ka Meghalaya Legislative Assembly hapoh ka jingialam u Brening A. Sangma kum u Chairman ka la leit jurip hynne ka sngi ia ki karkhana hapoh ka Byrnihat Industrial Area, Ri-Bhoi District, kiba la ioh jingiarap na ka Meghalaya Industrial Development Corporation Ltd. (MIDC Ltd).

Ia kane ka kynhun la ialam da u Chairman ka Committee u Brening A. Sangma bad ki dkhot kynthup u Marthon Sangma, Heavingstone Kharpran, Dr. Celestine Lyngdoh, Banteidor Lyngdoh bad u Bah Pius Marwein kiba long ki MLA.

Ka jingthmu jong kane ka jingjurip ka long ban khmih ia ki krkhana halor ka rukom siew ia ka ram ba shim na MIDC bad ka Committee ka la khmih bniah ia ki karkhana ki bym shim la siew thikna ia ka ram ne kiba siew tang khyndiat bad kyntu ba kin siew thikna man ka por ban pyndep ia ka ram.

Ka Committee ha ka jingjurip ka lap ba ka M/s CMJ Breweries Pvt. Ltd., Ri-Bhoi District, ka krkhana ba la siew thikna ia ka ram.

Katba ka M/s Greystone Strips Pvt. Ltd., Ri-Bhoi District bad M/s Greystone Smetters Pvt. Ltd., Ri-Bhoi District kim shym siew thikna bad ki la dang siew tang khyndiat bad ka Committee kan pan jingshai na u Managing Director ka kompani halor ka jingbym lah ban siew ia ka ram, kaba wanrah ia ka jingduhnong ka Jylla..

Ka M/s Byrnihat Hotel Cum Shopping Complex, Byrnihat Proper, Ri-Bhoi District, kam pat ban pyndep ia ka jingtei namar ka jingbym biang ka bording elektrik kaba la ktah jur ia ka jingpyniaid shakhmat ban sdang ia ka kam ban ioh kamai pisa ban siew ram, kumta ka Committee ka la pynthikna ban shimkhia ia kane ka kam bad ki bor ba dei khmih ban pynbeit ia ki jingeh ba katei ka karkhana ka kynduh.

Ka Committee ka kyntu ia ki trai kharkhana ban siew thikna ka ram, khnang ban kyntiew ia ka ioh ka kot ka jylla bad kumjuh ia ki karkhana ha ka Jylla.