Ka kam Ri dohkha ha Meghalaya ka la kiew

Ka jingri dohkha ha Meghalaya kam dei tang ba ka la roi; ka la nangkiew. Bad ka Fish Fest 2025 mynta u snem, kaba la pynlong kum shi bynta jong ka sngi jong ki nongri dohkha ha ka ri, ka pynshisha ia kata.

Ïa kane ka prokram la pynlong da ka Department of Fisheries ha ka jaka treikam jong ka kaba ha Shillong bad ha kane ka tamasa la wan ban ïashim bynta da ki nongri dohkha kiba la nang kiew shaphrang, ki heh ophisar jong ka distrik, ki riew shemphang ha ka kam ri dohkha, bad kiwei kiwei.

“Ka Fish Fest 2025 ka dei ka jingrakhe ïa ka jingtrei shitom jong ki nongrep jong ngi bad kadei ka rynsan ban don ka jingïatreilang,” ong u S. C. Sadhu, Secretary ka tnad Fisheries.

Haba kren halor ka jingtrei shitom ki nongri dohkha, u S.C Sadhu u la ong, “Mynta ka la pynpaw ia ka dor jong ka ioh ka kot bad ka jingïadei bad ka mariang, bad ka jingdonkam ban pynduna ïa ka jingshaniah jong ka jingdonkam ka jylla na ki dohkha kiba wan na shabar.”

“Watla ka Jylla ka la pynkiew ïa ka jingpynmih jong ka kumba saw haduh san shah haba ïanujor bad ka shiphew snem mynshwa, hynrei 30 haduh 40% ki dohkha ki dang wan na shabar ka jylla. Kane ka pynpaw ba dang donkam ban khmih hapoh ka jylla Meghalaya,” u la bynrap.

La ai kam ia kawei pa kawei ka distrik ban pyni ia ki jingnoh synniang kiba kyrpang.

Ka East Khasi Hills ka wanrah ia ki dohkha ba dang thymmai ryngkat bad ki dohkha trout bad ki dohkha tyrkhong. Ka West Jaiñtia Hills ka la pynpaw pyrthei ïa ki dohkha ba la shet tdem (Kha Rang) bad ki dohkha ba la shet thymmai (Kha Saw). Ka Ri Bhoi ka la pyni ia ki Java Puthi (Java Puthia). Ka Eastern-West Khasi Hills bad ka South-West Garo Hills ki la shim ia ka lynti ban pynkiew ia ka dor, bad ka MSFR&TI, Mawpun, ka la pyni ia ki buit ri dohkha kiba mynta.

Ha kajuh ka sngi, la sam khusnam sha ki nongrep kiba pawnam na baroh ar tylli ki thain Khasi-Jaintia bad na Garo Hills. Na East Khasi Hills, u Bah Barilang Skhemblon u la lah ban pynmih dohkha haduh 5.25 MT, ha kaba u la kamai T. 13.13 lak. Ha East Jaiñtia Hills, u Bah Lamsing Tynsong u la pynmih haduh 3.503 million ki symbai dohkha, kaba la pynmih ïa ka jingïohnong kaba phylla haduh T.70 lak. Katba ka Danosha Tlang, kaba dei ruh na East Jaiñtia, ka la wan hakhmat duh ha ka jingpynmih jingbam dohkha da kaba pynmih 330 MT bad ka jingïoh kamai ka long T.130 lak.

Ka Garo Hills ka la don la ki jong ki nongjop. U Jranggrim C. Marak na East Garo Hills u la pynmih 1.80 MT ki dohkha kaba kamai 4.50 lak, katba u Almith Momin u la pynpoi 2.85 million ki symbai dohkha, kaba kamai T.57 lak. Ka Kerina R. Marak ka la poi sha ka 82 MT ha ka jingpynmih jingbam, kaba la kamai T. 41 lak.

Kine ki jingkhein ki pyni ia ka jingaiti, ka rukom treikam kaba stad, bad ka jingkyrshan kaba ioh na ki skhim kum ka Blue Revolution bad ka Rashtriya Krishi Vikas Yojana.