T.400 klur na bynta ban pyntrei ia 53 tylli ki project ha Garo Hills

U Myntri Rangbah ka Jylla Conrad K Sangma mynta ka sngi ula buh mawnongrim ia ka mini stadium ha Damas da ka jingthmu ban plie lad ia ki samla ka Disrict ha ki kam ialehkai. Ia ka prokram la pynlong da ka tnad Sports & Youth Affiars ha Sacred Heart Secondary School, Damas, North Garo Hills.

Kiwei kiba donlang ki long u Timothy D Shira, Myntri ka Tourism, Fisheries bad Agriculture, u Marthon D Sangma, Chairman, Meghalaya Tourism Development Corporation bad MLA ka Mendipathar Constituency, u Rupert M Momin, MLA ka Kharkutta Constituency, ki Ophisar ka Tnad Sports & Youth Affairs, Agriculture, ki bor District, ki nongialam ka thain, ki samla pule bad ki paidbah.

Haba kren ha ka jingialang, u Myntri Rangbah ula ong ka jingdawa ba la sahteng la slem jong ki samla ka Damas ban ioh ia ka madan ialehkai, mynta ka la urlong da ka jingbei tyngka ba T.3.44 klur ka Tnad Sports & Youth Affairs ban shna ia ka mini stadium. Ula bynrap ka jingbuh mawnongrim ban pynurlong ka jingkular da ka song T.3.44 klur ban tei mini stadium thymmai ha Damas.

Ula ong kane ka project kan pynkylla ia ka madan ba don mynta sha ka madan ialehkai ba janai bad kaba don ia ki cover bad open gallery bad ki jingdonkam ban pynbha ia ka madan bad bynrap ba “Kane ka mini stadium la ap la slem kum ka jaka ba lah ban pyndonkam bun kiei kiei na ka bynta ki samla ki skul bad ka Shnong”.

U Myntri Rangbah ula bynrap ka stadium kan iarap ia ki nongialehkai ka thain ba kin ioh ia ka rynsan iakop ba kham bun, haba pynpaw ba kan “pynlah ia ki nongialehkai jong ngi ba kin leit iashim bynta sha ki lympung ba shabar kum ha ki District, Inter-District bad Inter-State”.

Ula pynpaw ka Sorkar ka dang trei ia ki kam ban pynurlong ia ka thong ban pyntrei ia 510 tylli ki jingtei jaka ialehkai hapoh u 2028, da ka jingthmu ban pynmih ia ki nongialehkai ba lah ban mihkhmat ia ka Ri ha ka 2032 Olympics, ula pynbna yn ym don ki district, ki block, ne ki shnong ki ban shah ieh shadien”.

Haba kdew ia ki kam pynroi ha ri-lum Garo, ula ong palat T.400 klur lah ai ka jingkular na ka bynta ki 53 tylli ki project, katba ha North Garo Hills, khyndai tylli ki project ba shongdor T.33.81 klur la pyntrei naduh u nem 2018 kynthup ia ki stadium, basketball court bad ki jaka ialehkai indoor”.

Haba kdew halor ka sap ialehkai ki trai shnong, ula pynpaw ia ka kyrteng u Henry A Sangma, u nongialehkai na Babukhona, North Garo Hills, uba la jop ia ka takma rynnong ha ka North East Olympic Games, bad Cherim Ch Sangma na Bajengdoba, North Garo Hills, uba la sdang ia ki jinghikai ha u 2023 bad nangkiew lyngba ka STAR programme sha ka Advanced Athletics Programme.

Kiwei pat kiba la ai jingkren ki kynthup ia u Timothy D Shira, Myntri ka Tourism, u Dpeuty Commissioner ka North Garo Hills Abhishek Saini bad kiwei kiwei.

Ha kajuh ka por, ha kane ka prokram la pynher lama ia ki kali Mission Organic Value Chain Development na bynta ka North Eastern Region (MOVCDNER) u snem 2024-25 bad 2025-26. Kine ki kali ki kynthup ia ki power tiller ba la thied hapoh ka State Plan Scheme (Farm Mechanization).