Ai jinghikai ka DREAM ia ki khynnah ba pep skul shiteng por ban lait na u drok bad sengkam lajong

Ka sorkar jylla lyngba ka Drug Reduction Elimination and Action Mission (DREAM) hynne ka sngi ka la pyllong ia ka Exposure prokram ban iarap ia ki khynnah ba pep skul shiteng por, khnang ba kin lait na ka shrip jong u Drok.

Ia kane ka prokram la pyllong ha Don Bosco Technical School ha kaba la wan iashim bynta kumba 60 ngut eiei ki khynnah kynthei bad Shynrang na kylleng ki jaka kum na Balat, Kyrdemkulai, Nongpoh bad na kiwei ki jaka.

Ka jingthmu jong kane ka prokram ka long ban pyllait ia ki khynnah kiba pep skul shiteng por bad ki bym don kam donjam na u Drok bad kumno ba kin ioh ka jinghikai khnang ba kin lah ban ieng ha la ki jong ki kjat ban seng kam.

Haba kren sha ki lad pathai khubor u Mission Director ka DREAM u bah Francis Kharshiiing ula ong ba kane ka pyni ia ka mon ba skhem jong ka sorkar ban pynduh pyndam ia u droks namar ban tehlakam ia u drok kam dei eh tang ka kam jong ki pulit hynrei kaba donkam eh ka long ban iatreilang.

“ Ka jingthmu jong kane ka long kaba jngai bha bad ka long kawei na ka lad jingiada ia ki khynnah ban lait na ka shrip jong u drok. Ki khynnah ynda ki la ioh ia ka jinghikai ki lah ban ieng ha la ki jong ki kjat bad ki lah ban ioh ia ki Degree bad ban ioh kam wat shabar ri ruh,” ong u bah Kharshiing.

Ula iathuh ba kum kane ka prokram la plie lad ym tang ia ki khynnah na Sor hynrei la plie lad ruh na bynta ki khynnah kiba na nongkyndong.

Ha kajuh ka por, ula iathuh ba ka DREAM mynta ka dang leh ia kawei ka projek ban iarap ia ki khynnah na nongkyndong ki bym lah ban wansah ha Shillong ha kaba kin ialam sha Kyrdemkulai sha Animal Husbandry Farm ban pyni ia kito ki khynnah kiba kwah ban ri jingri.

“ Ngi wan lang hangne ban ktik ia ka mynsiem jong ki ban pyni ia ki jingai jinghikai kaba ki lah ban ioh ha Don Bosco technical school, “ ula ong.