Hiar jurip ka sorkar ia ki shnong khappud ba shah thombor ha ki Bangladesh

Ka kynhun ba 3 ngut ba la phah da u Myntri Rangbah ka jylla, hynne ka sngi ka la leit ban peit ia ka jinglong jingman jong ki paidbah ha khappud khamtam dang shen ki runar na ri Bangladesh ki la wan hiar thma ia ki paidbah ha ka thain Khonjoy, South West Khasi Hills District. Kane ka kynhun ba 3 ngut ba la phah da u Myntri Rangbah u Conrad K Sangma bad u Myntri kam pohiing ka jylla u Bah Prestone Tynsong, ka kynthup ia u MLA ka Mendipathar u Marthon J Sangma, u Bah Himalaya M Sahngpliang u Nongaibuit ka tnad pule bad u Bah Kitborlang Nongrem uba long u Vice Chairman. Hadien ba ka sorkar ka la ioh pdiang ia ka shithi na ki paidbah nongshong shnong ka thain Khonjoy bad Maheskhola halor ka jingsyier ki paidbah ha kane ka thain khappud, kumta ka sorkar jylla ka la phah ia katei ka kynhun ki 3 ngut ban iakynduh ia ki paidbah ka shnong Khonjoy B, ka shnong Rangdongai bad ka shnong Maheskhola bad ki la pynlong ia ka jingialang ban tip ia ki jingeh ki paidbah nongshong shnong ki iakynduh.

U Marthon J Sangma ula ithuh ba ki la iakynduh ia ki paidbah ki lai tylli ki shnong kiba la shah ktah na ka jingwan thombor ki nong Bangladesh bad ki la ioh ia kiba bun ki jingtip halor katei ka jingjia bad ki jingeh kaba mad da ki paidbah. “Ki paidbah ki la pyntip, ba watla ka la don ka jingker sainar shiah ha shilynter ka khappud hynrei ki don ki bynta ka jingker sainar ka la khyllem noh na ka daw jong ka jingjur u slap bad ki don ki jaka ba jngai na ki BOP” ong u Marthon bad ka pyntip ba ki paidbah mynta kim da don than shuh ka jingtieng ne ka jingsyier namar ba ki pulit ki la pynkhlain ia ka jingpahara da kaba iatrei ryngkat bad ki shipai Border Security Forde (BSF).

Katba u Bah HM Shangpliang ula ong, ba ka jingioh lad ban rung tuh kine ki nong Bangladesh ka buh jingma ia ki paidbah nongshong shnong bad khamtam eh ia ki khynthei bad ki longkmie na ka jingshah thombor bad kumta ki la dep ban ia kren bad u SP ka SWKH u Bah B Jyrwa uba la pyntip ba ki la pan shuh shuh ia ki bor pahara ban pynjur pahara ha kane ka thain.Ula pyntip ba kaei ba kane ka kynhun ha dien ba ka la lap ban ioh jingtip na ki paidbah ba sah ha khappud kumta kan sa pynkhreh ia ka kaiphod  bad kan sa aiti sha ka sorkar jylla khnang ba kan ioh ban leh ia kaba donkam.