Hiar jurip u MR ia ka Shillong Government Engineering Kolej

U Myntri Rangbah ka jylla u Conrad K. Sangma hynne ka sngi ula leit jurip ia ka Shillong Government College of Engineering, kaba la ioh pdiang ia ka jingmynjur na ka All India Council for Technical Education (AICTE) ban sdang ia ka Undergraduate Course ha ka Civil Engineering bad Electrical Engineering na ka bynta ka samoi pule jong u snem 2025-26. Ha kane ka jingleit jurip u Myntri Rangbah, la synran ia u da ki ophisar na ka tnad pule puthi bad ka Shillong Polytechnic College, u Myntri Rangbah ula jurip ia ka jingtei jong ka Engineering College bad ula lum ia ka jingialang bad ki nonghikai jong ka College ban sngewthuh ia ki jingdonkam jong kane ka college. U Myntri Rangbah ula pynthikna ba yn sa shimkhia ia baroh na bynta ban kyntiew bad pynbiang ia ki jingdonkam jong kane ka jaka pule ba kan lah ban treikam pura katkum ka jingbthah jong ka AICTE.

Ki nonghikai jong ka Shillong Polytechnic College ki la pynpaw ha u Myntri Rangbah ia ka jingdonkam ban bhah tyngka na ka bynta ka jingwad bniah ha ka Science & Technology, ha kaba u Myntri Rangbah ula mynjur ia kane bad ula pynshai, kumba long mynta ka Chief Minister’s Research Fellowship (CMRF) ka bei tyngka na ka bynta ki kam wad bniah ha kaba ia dei bad ka Arts & Culture, kumta yn sa pyniar ban kynthup lang ia ki jingwad bniah ha kaba ia dei bad ka Science & Technology. Ka Shillong Government College of Engineering ka dei ka Engineering College sorkar kaba nyngkong eh ha ka jylla bad ia ka Letter of Approval (LoA) la phah sha u Principal Secretary ka tnad pule puthi ha ka 30 tarik u Iaiong.

Kane ka jaka pule ka don ha Mawlai Kynton Massar ha East Khasi Hills District bad ka dei kaba pyniasoh ne Affiliate bad ka skulbah North Eastern Hill University (NEHU) bad ha kane ka College kin don artylli ki Undergraduate Program ki kynthup ia ka Civil Engineering bad Electrical Engineering kin sdang da kaba shim shwa tang 30 ngut ki samla pule na ka bynta ka samoi pule jong u snem 2025-26.