Ba pynmih jaboh shna surok, dawa ka JNC ia ka Company ban shimkhia

Ka Jaiñtia National Council (JNC) Khliehriat Circle ka la dawa na ka Purbanchal Buildtech Pvt Ltd ban shimkhia ban pynduna pynmih jingjaboh dewbilat ha ka por pyntrei ïa ka surokbah National Highway 6 ha Khliehriat ka East Jaiñtia Hills. Ka JNC kala kdew ba ka jingmih ki jaboh naka dewbilat ka la ktah haduh katta katta ïa ki nongleit nongwan, kynthup ïa ki samla pule bad ki nongshong shnong jong ka thaiñ. Ha ka kyrwoh, ka JNC ka la pyntip ba kala thoh ruh sha u deputy commissioner na ka bynta ban ai jingbthah kaba donkam sha ka Company ban pynthikna ban theh um man ka por ia ka surok ha ka por ba shna ia ka surok ban weng ia ka jingjaboh.

Ka JNC kala ong ba wat hapdeng ka hukum ba la pynmih da u DC, ka Company kam shym la lah ban shim ia ki lad jingiada na ka jingmih jaboh naka dewbilat. “Namar kata ngi la ïakynduh ïa u engineer ban dawa shim iaki sienjam ban iada naka jingpynmih iaki jaboh. Ngi la pynpaw ïa ka jingktah kaba sniew jong ka dewbilat ïa ka koit ka khiah jong ki paidbah bad ka jingim ba man la ka sngi, da kaba kyntu ba ïa ki jingkyrpad jong ngi dei ban pynbeit khlem da pynslem,” la ong ka kywroh naka JNC.

Ka JNC kala pyntip ba u engineer jong ka kompeni u la pynthikna ban shim iaki sienjam ban pynkhuid iaka surok arsien shisngi. Ha kajuh ka por, ka JNC ka la maham ban shim ia ka rai kaba tyngeh lada ka kompeni kam lah ban weng ia katei ka jingeh.