Hiar jurip u Myntri Rangbah ia ki jaka ba shah pynjulor ha nongbah Tura

U Myntri Rangbah ka jylla u Conrad K. Sangma, hynne ka sngi Palei u la leit jurip ia kiba bun ki dong ha sor Tura ban peit ia ka jingshah ktah ka jingshah pynjulor ba mih na ki jingiakynad dang shen.Ha kane ka jingleit jurip, u Myntri Rangbah u la iakren bad ki nongshong shnong, ki nongialam shnong, bad ki ophisar ban peit ia ki kam ban pynbiang ia ka leit ka wan ha kiba bun ki bynta jong ka sor. U Conrad ha kane ka sngi ula leit khmih ruh ia ki jaka ha kaba ki dukan bad ki iing ki sem kiba la shah pynjulor na kane ka jingiakynad, bad u la kular ba ka sorkar kan shim ia ki sienjam kiba donkam ban iarap ia kito ki briew bad ki kam khaii kiba la shah ktah.

Ha kajuh ka por, ki nongshong shnong ha kane ka sngi ki la mih hi da ka mon sngewbha ban iashim bynta ha ki kam pynkhuid ha kiba bun ki bynta jong ka sor Tura. La iohi ia ki dkhot ka imlang sahlang, ki kynhun samla, bad ki seng bapher bapher ba ki iatreilang ban pynkhuid ia ki tiar ba la pynjulor na ki jingiakynad. Ia kane ka kam pynkhuid la pyndep ha kiba bun ki iew bad ki rud surok, ha kiba ki briew ki la pyndonkam da ki tiar bad ki kali ban pynkit ia ki jaboh bad ban pynitynnat biang ia ka sawdong sawkun. Kane ka sienjam ka pynpaw ia ka jingtylli kaba skhem hapdeng ki nongshong shnong kiba la pynpaw ia ka jingkut jingmut ban shna biang bad ban wanrah biang ia ka jingshongsuk ha ka sor.

Ki bor sorkar bad ki nongialam shnong ki la iaroh ia ka jingtreishitom ki paidbah, bad ki la ong ba kum kine ki kam ba iatreilang ki donkam bha ban wanrah biang ia ka jingsuk bad ka jinglong kaba dei ha ka sor. Na ka liang ki bor synshar district ruh ki dang bteng ban peitngor ia ka jinglong jingman ha kane ka jaka da kaba iatreilang bad ki kynhun jong ki shnong ban pynbiang ba ka kam pynkhuid kan iaid beit iaid ryntih.