Hiar thma ki Muslim na Bangla ia ki Khasi, mynsaw jur 2 ngut ba shah pom

Ki Khasi ba sah ha shnong Kalakhal ha Cachar District, Assam ki don hapdeng ka jingma bad syier hadien ka jingjia shah thombor ar ngut ki Khasi ha ki khar Muslim na Bangladesh katba ki dang leit sha bri kwai ha ka 15 tarik mynta u bnai. Haba iakren bad u President ka KSU Barrack Valley u Bah Walton Rymbai ula iathuh ha ka 15 tarik u Nailar, katba 6 ngut ki Khasi ki dang leit sha bri kwai bad bri tympew, kumba 25-30 ngut ki Muslim na Bangladesh ki la wan hiar thma kynsan bad ki shoh bad pom da ka wait ia 2 ngut haduh ki la mynsaw jur katba 4 ngut kiwei pat ki la ioh lat phet noh.

Ula iathuh kane ka thain bun ki briew ba shong ki dei ki Muslim ba ki la thmu ban pyniap ia ki Khasi bad kine ki Muslim ki dei kiba ju mlien ban kyntur pud ia ki jaka ki Khasi ba sah ha Kalakhal, Cachar District, Assam U la ong kine ki 2 ngut ba la mynsaw jur ki kynthup ia u Raju Kasar bad u Vikash Synkor na ka shnong Kalakhal bad mynta ki don hapdeng ka jingshah sumar ha Silchar Medical College & Hospital ki la shah pom da ka wait. “Ngi la iakynduh ia u Superintendent of Police (SP) bad Deputy Commissioner (DC) ka Cachar District bad ki la pynpaw ban shimkhia ia kane ka jingjia bad ar ngut na kiba donkti ban thombor ki la shah kem” la iathuh u Bah Walton bad ula bynrap ka seng kam pat sngewhun halor ka jingioh kem tang ia kine ki arngut bad ka kwah ba dei ban kem ia baroh 25-30 ngut kiba donkti ban thombor bad dei ban pynshitom tyngeh katkum ki kyndon aiñ.

Ula bynrap ki la dawa ban ai ka jingiada ia ki paid Khasi ba sah ha katei ka thain, namar kumba long mynta ki Khasi ki im hapdeng ka jingsyier bad rit mynsiem bad ki khynnah skul kim nud shuh ban leit sha skul bad ki paidbah ban leit sha ki iew ki hat.U Bah Walton ula ong, ki pulit ki la pahara ha kitei ki thain hynrei ki paidbah ki don hapdeng jingtieng namar ki Muslim na Bangladesh ki la byrngem ia ki Khasi.Ula iathuh lashai sngi Nyngkong ki nongialam kin lum jingialang ban ia pyrkhat halor kane ka jingjia bad ban shim ia ki rai kumno ban iada ia ki paradoh ka jingshah thombor ha ki khar Muslim.