Iaid paidbah ka APSTA, pyrshah ban pynduh nonghikai Deficit bad ka MEG

Ki nonghikai hapoh ka shatri All Primary School Teachers’ Association (APSTA) hynne ka sngi ki la pynlong ka jingiaid paidbah ban pynpaw ka jingpyrshah ia ka Meghalaya Education Grant (MEG) bad ban dawa ba dei ban bteng beit ka jingtreikam ki nonghikai Deficit bad nalor kiwei kiwei ki jingdawa. Ia ka jingiaid paidbah ha ka jingsyrtap ki bor Pulit ka la sdang naduh ka por 10 baje mynstep na Jail Road ha kaba ki nonghikai ki la iaid lyngba ka thain Khyndai Lad ter ter sha Ophis Deputy Commissioner, Ward’s Lake, Polo bad la pynkut ha Golf Link Community Hall. Haba kren sha ki lad pathai khubor u general secretary ka APSTA u Bah FC Shullai ula ong ba ka jingpynlong ia kane ka jingiaid paidbah ka long ban pynpaw ka jingpyrshah ia ka tand pule puthi ka Sorkar jylla ba ka thmu ban pynduh noh ia ki nonghikai Deficit.

“Hynnin ka sngi ki la pynmih sa ka order halor ka one management one School account kane kaba ktha bha namar lada ki don saw ki skul hakawei ka compus ruh la hap don tang kawei ka management , hynrei ka tulop ka iapher na kawei sha kawei ” u la ong .”Ki nonghikai kim pyrshah ia ka MEG baroh namar kin don ruh ki jingmyntoi na kane khamtam ha kaba iadei bad ka jingpynkiew ia ka tulop ki nonghikai adhoc bad kiwei ki nonghikai hynrei ym lah pat ban knieh ia ka post ki nonghikai Deficit ban pynheh ia ki post sha ki adhoc lane kiwei ki nonghikai”.U la ong ba Kumno ka tand pule ka shu ong ban pynkut noh ia ki post jong ki nonghikai Deficit ynda ki la shongthait,namar kat kum ka jingbthah ka MEG ka long ba ynda ki nonghikai Deficit ki la shongthait ia ka post ym pynkut noh bad ym ai noh sha ka MEG .

“Ka jingkwah jong ngi ka long ba lada ki kwah ban pynheh pisa ia ki nonghikai adhoc ki dei ban sei da ka pisa ka sorkar ban pynheh ym ban knieh na ki nonghikai Deficit” u la ong . U la bynrap ba “Kawei ka long ka jingbthah ka long ban ai ia ki management sha ki School Managing Committee bad ia ka pisa ym thep ha ka School Managing Committee” .U bah Shullai u la ong ba kane kam dei ba ki bishni ia kiwei ki nonghikai hynrei kaei ba ki kwah ka long ba ki nonghikai Deficit kin neh bad ki nonghikai kim kiew , khlem ka jingktah ia kino kino ki nonghikai ruh .