Pynkhreh ka sorkar ban pynkhuid ia ki lynti iaid kjat bad ki surok: Ampareen

Ka Myntri Sorkar kaba dei ruh ka MLA jong ka East Shillong constituency ka Kong Ampareen Lyngdoh ka la pyntip ba ka Sorkar ka dang pynkhreh ia ka Plan ban pynbeit ia ka kam ki nongdie jingdie madan ha Laitumkhrah. Haba kren sha ki lad pathai khubor ka Kong Ampareen ka la pynpaw ia ka jingkyrmen ba ka rai ka Sorkar ban pynkynriah ia ki nongshong dukan madan kan wanrah ia kajuh ka dur jong ka Khyndailad ha ki surok ka Laitumkhrah.Lah ban kdew ba u nongaiktien ka Sorkar MDA u Bah Paul Lyngdoh u pynbna baka Sorkar kala rai ban weng lut ïa baroh ki nongdie jingdie madan na Laitumkhrah, Civil Hospital Point bad Them Bijoy haduh Motphran hapoh u bnai Naiwieng 2025.

Ka kong Ampareen kala kular ba ka Sorkar kan leh ia kane ka kam da ka jingphikir bha bad ka thong ka long ban wad ia ki lad ki lynti ki ban ai jingmyntoi ia baroh ki kynhun kiba don bynta.“Bad ka Sorkar ka donkam ban kynmaw ba ka jingtuklar ka Iingkashari ka don tang shipda maw na ki nongshongshong. Ngin hap ban shimkhia ia kane ka kam da kaba leh phikir bha. Ngin hap peitbniah ia ka jinglong jingman. Nga kyrmen ba ngin sa iohi ia kaei kaba long mynta ha Khyndailad ha ki surok ka Laitumkhrah” la ong ka Kong Ampareen.

Haba pynpaw ba donkam ban da khein jingkhein bha ha kaba leh eiei ia kane ka kam, ka kong Ampareen kala ong “Ka dei ka kam kaba jyrwit jyrwat bha bad kum ki nongshongshnong ngan ym kynthoh eiei ia ka kam kaba dang lung. Lano ngin pynkynriah iaki, kumno ngin pynkynriah ia ki balei ban gin pynkynriah iaki bad shano ngin pynkynriah iaki, ngi hap ban long kiba iai shah. Kynmaw ba kane kakam ka ktah ia ka jingim ki briew, ngi hap ban husiar bha”.