Iaid paidbah ki dkhot FKJGP ha Nongstoin ban dawa pynbeit pud Meghalaya-Assam

Ki nongialam ka Seng Federation of Khasi Jaintia & Garo People (FKJGP) Sengkmie kynthup ia u President bad General Secretary ki la ieng rynsan ha Nongstoin ban ai jingkren halor ka jingpynsah teng ka Sorkar Meghalaya bad Assam ban pyndep ia ka jingpynbeit pud ha ki shnong khappud ia ka bynta ba ar ka jingpynbeit pud hapdeng kine ar jylla.Haba ai jingkren ha ka jingialang ha Market Complex ha shnong New Nongstoin kata hadien ba la dep ban iaid rally u president rangbah duh ka Seng FKJGP Sengkmie u bah Dundee Cliff Khongsit ula ong, ba ki kongialam bad ki dkhot ka FKJGP ka jaitbynriew ka dei ka dkhot met jong ngi bad lada ki para doh para snam ha ki thain khappud ki iakynduh jingeh ka pang ka mynsiem.U bah Dundee ula ong, ba man ki political party ki buh ia ka menifesto ia ka mat jong u pud u sam hynrei ngi iohi ba ka dei tang ka mat ha ka por election jong ki party bapher namar tang la dep ka election bad tang la dep niew vote ki la klet noh ia kata ka mat, kumta ula kyntu ia ki dkhot ka seng bad ia ki paidbah ba kin ai ka jingkyrshan ia ka seng, lada ka seng ka donkam ha ki jingiakhih ba tyngeh.

Haba kren ha ka jingialang u bah Eldy Newton Lyngdoh General Secretary ka FKJGP Sengkmie ula ong, kum ka Seng ngi dap da ka mynsiem ba sngewkhia namar ka jingbym leh eiei ka sorkar khamtam ban pyndep noh ia ka jingpynbeit pud ba dang sahteng hapdeng kine ki ar jylla.Shuh shuh ula ong ka jingleh donbor ka Assam kam dei shuh ba dang thymmai bad ka jingshah thombor ha ka Assam ka la sdang naduh u snem 1951 bad dei ha kane ka snem ba ka Jaitbynriew Khasi Pnar ka iam briew namar ha kane ka snem lyngba ka shiti lane Notification ka sorkar Assam ka la knieh jubor ia ki jaka ha Labang Nongphyllut Daloiship Block-1, ka Raid Nongtung Thangwang Block-2 ban ai sha ka United Kachar bad Mikir Hills ba ngi tip mynta kum ka Karbi Anglong. Katba na ka liang jong u bah Franklin Roy Syiemiong General Secretary ka Seng KSU WKHD haba ai jingkren ula ong, ngim kwah satia ba ngin long ta ki nongtom um ki nongthoh dieng jong no re jongno bad lyngba kane ka sngi kan pynkynmaw ia ngi ba ngin ym hun satia tang ban shu shongsuk ban biang u saipan shimet bad ha kine ki sngi la i kumba ka jingkitkhlieh bad ka jingiatip lem ia ka imlang ka sahlang ka la nangjah kumba nangjah ki pud ki sam bad ki mawpud ki sakma.

Shuh shuh ula ong, ki longshwa ki la aiti met bad mynsiem bad jaw snam na ka bynta ka bha ka miat ka pateng ba mynta bad hato ma ngi kaei pat ba ngi dei ban leh na ka bynta ka bha ka miat jong ki pateng ban wan, na ka liang jong ka KSU kumba ka la iadon ryngkat bad ka FKJGP ha ki por ba la leit kan iai bteng ban ia don ryngkat na ka bynta ka bha ka miat ka Ri bad ka Jaitbynriew.