Ai jingiarap ka KSU ia ki khynnah ha NEIMA Children’s Home

Ka KSU NEHU Unit ha ka sngi Saitjain ka la leit ai jingiarap ia ki khynnah ka NEIMA Children’s Home ha Pynursla bad ha kane ka sngi ki nongialam ka KSU ki la ialehkmen lang bad ki khynnah jong ka NEIMA.Ka KSU NEHU Unit hapoh ka jingialam ka samla Ibakordor Marwein kaba long ka General secretary, kala leit ai jingiarap ia ki khynnah jong ka NEIMA, ha kaba la iadonlang u Babu Khonglah u nongpyniad bad nongpeit jong ia kane ka jaka ri khunswet, ha kaba ula pynpaw ba ka daw kaba pynlong ia ki nongpyniad jong katei ka jaka ri khunswet ban seng ia katei ka jaka ka long namar ba bun na ki kynnnah kim don kmie don kpa shuh bad ki hap ban leit sah sha kiwei pat ki jylla lyngba ka jingiarap ki misson kiba nabar.

Ula iathuh ruh ba ki dang don bun bha kiba kwah ban wan ha katei ka jaka hynrei kim lah shuh ban pdiang namar ba la khapngiah ka jaka.Ka KSU NEHU kala pynlong ruh ia ka jingialeh kai pynbyrngia ia baroh ki khynnah naduh ki klas Nursery, KG, ter ter haduh ki klas XII ban wanrah ia ka jingkmen bad ka jingieid bad ia ka durkhmat ba phuh samrkhie bad ban sei ia ka sap ka phong jong kine ki khynnah.

Ka jingthmu jong ka KSU NEHU Unit ban leit jngoh bad ban ai jingiarap ka long ban ai mynsiem ia kine ki khynnah ba kin ym duh jingkyrmen hynrei ba kin iai don ia ka mynsiem jong ka jingkmen bad ba kin ieng bad minot thop ha ki jingpule ki jongki khnang ba lashai la shi sngi kin ioh ban iarap kylliang ia kiwei pat kiba shem jing jynjar.