Iaid Rally ki paidbah pyrshah ia ka sorkar MDA ha Garo Hills

Da ki spah ngut ki paidbah ka ri lum Garo hynne ka sngi ki la mih madan ban iashim bynta ha ka Rally bad ka jingialang paidbah ba long ha Purakhasia, South West Garo Hills ban pyrshah ia ka jingbym ler treikam ka sorkar MDA ban weng ia ka jingeh jong ki nongtrei ka Garo Hills Autonomous District Council (GHADC).Ia kane ka rally la pynlong da ka Joint Action Committee ka Purakhasia ba la lam khmat da u Dr Mukul Sangma bad la wan iashim bynta lang ruh da ki nongialam ka Trinamool Congress ryngkat ki paidbah kynthup naduh ki kynhun sengbhalang, ki tymmen ki san nalor ki khynnah samla. Ha kane ka rally, ki paidbah ki la rai ban dawa na ka sorkar jylla ba ka dei ban shimkhia mardor ban weng ia kane ka jingeh jong ki nongtrei ka GHADC bad kadei ban buh hakhmat ia ka bha ka miat jong ki paidbah Garo. Haba kren ha kane ka sngi u Dr.Mukul ula pynrem jur ia kane ka sorkar MDA halor ka jingbym lah ban shimkhia ia ka jingdawa jong ki nongtrei ka GHADC kiba la iakhih la 43 bnai ban dawa ban siew ia ka tulop ba sahteng jong ki.

Ha kane ka jingialang, u Mukul ula pynpaw ia ka jingpyrshah jur halor ka jingkren jong u Myntri Rangbah ka jylla u Conrad Sangma uba la kam ba ka sorkar kam don jingbahkhlieh na bynta ban siew ia ka tulop jong ki nongtrei ka GHADC. Ula ong ba katkum ka Article 275 jong ka riti synshar ka ri, kaba bthah ban ai jingkyrshan pisa na bynta ban pynkhlain ia ki jaka riewlum ha ki ADC. Ula bynrap ba dei hapoh kane ka kyndon ba ka sorkar hapoh ka jingialam jong u mynshwa ha u snem 2015-16, ka la lah ban don bynta bad ka sorkar pdeng na bynta ban pynioh ia ka jingiarap pisa ne ka Special Assistance Package kaba T.100.71 klur ban iarap ia ki Autonomous District Councils. Ula kdew ba kane ka pisa la bei tang shisien hynrei kane ka sorkar kam shym la lah ban pynioh ia ka pisa jingiarap namar ba kim shym la aiti ia ka utilisation certificates (UC) sha ka sorkar pdeng.

Ula ong ba ha ka por ba u ialam ia ka sorkar kum u Myntri Rangbah, u la trei khlem shongthait na bynta ban pynkhlain ia ki Autonomous District Councils ha ka jylla. Ha kajuh ka por, ula ban jur ba ha ka sorkar jong u, ladep pas ia ka State Finance Commission Act 2012 hynrei kane ka sorkar kam shym la lah ban pyntreikam bad kam shym la lah ban thaw ia ka Committee kaba donkam. Ula pynshai ba ynda la pyntreikam tikna ia kane ka Ain, ka GHADC kan sa lah ban ioh jingiarap na ka Consolidated Fund jong ka sorkar pdeng katkum ka kyndon jong ka Union Finance Commission bad kane kadei kawei na ka sienjam kaba donkam na bynta ban pynkhlain ia ka Autonomous District Councils.