Iakren u MR bad ki Nokma ban wanrah jingkylla ha GHADC

U Myntri Rangbah ka Jylla Conrad K Sangma hynne ka sngi, ula iakynduh ia ki Nokma na kylleng ka Rilum Garo bad iakren ia ki mat bapher bad khamtam ia ka jingeh ba mad da ka Garo Hills Autonomous District Council (GHADC) ban siew tulop ia ki nongtrei. Ia kane ka kynhun ki Nokma la ialam da u President ka Garo Students Union (GSU) u Tengsak Momin. U Myntri Rangbah ula pynpaw ia ka jingsngewnguh ia ki nongialam bad ki sengbhalang kiba la wan iashim bynta ha ka jingialang ban iakren halor ki mat bapher bapher khamtam ki jinglong jingman ba long mynta ha GHADC kaba don hapdeng ka jingbym shngain ha ka liang ka pisa ka tyngka bad lada ym lah ban leh eiei, ka lah ban lam ia ka Council sha ka jingeh kaba khraw bha.

U Conrad ula ong “Ka jinglum khajna ne pynmih pisa jong ka GHADC mynta u snem ka long tang kumba T.25 klur katba ka jingpynlut na ka bynta ki nongtrei ka kot T.70 klur, kaba la iapher bun shah ha ka jingpynmih pisa bad jingpynlut pisa bad ha kum kane ka khep, ka Sorkar kala wan shakhmat ban tuklar tang ban wanrah ia ka jingpynkylla ha ka rukom pyniaid ia ka pisa tyngka bad ka jingshngain ka pla tyngka ha GHADC”. “Ka jingtyrwa jong ngi ka long tang ban siew ia ka tulop jong ki nongtrei ka GHADC naduh ka 1 tarik Naiwieng 2025 kum ka lad ban pyllait ia ka GHADC na ka jingeh bad kan long na ka bynta ka bha ka miat ki nongtrei bad ruh kum shibynta ban wanrah ia ka jingkylla ha ka Council” la ong u Conrad bad ka bynrap ba ka Sorkar Jylla kam don bor ne u pud halor ka jingtreikam jong ka GHADC.

U la batai bniah halor ki jingpynkylla ki ban shim kynthup ia ka jingdon noh ka Service Rules jong ki Council, ka policy ban thied ia ki tiar ki tar, ban buh ia ki nongtrei katkum ka jingdon ka kam bad kiwei kiwei ki bynta.