Iakynduh ki MDC liang pyrshah ia u CEM, ba sahkut shkim bad ki bill ban siew ia ki kontraktor

Ki MDC ka liang pyrshah hynne ka sngi ha ka sien ba nyngkong ki la leit ban iakynduh ia u Chief Executive Member (CEM) ka Khasi Hills Autonomous District Council (KHADC) ban pan jingshai halor ka jingsahkut ki skhim bad ki Bill ba dei ban siew sha ki kontraktor. Haba kren sha ki lad pathai khubor, u bah Titosstarwell Chyne uba dei u nongialam ka liang pyrshah ha KHADC, ula ong ha ka Executive Committee barim ki konstiwensi baroh ki la ioh ia ka skhim na ka 15th Finance Commission jong ka 1st Installment kaba kot sha T.30 lak,T.40 ne T.50 lak. U bah Titoss ula iathuh ba ka EC barim, ka la ai ruh ia ki work order ha shwa ka ilekshon MDC bad hadien ba la kut ka ilekshon naduh u bnai Lber-Iaiong, 2025 ki la sdang pyntrei ia kane ka skhim, hynrei kynsan kynsan kane ka EC ba mynta ka la pynsahngeh ia ka jingsiew ia ki Bill da kaba ai daw ba don jingthut ha ki bor ki kor treikam.“Ka jingiakynduh jong ngi ia u CEM ka long ban pan jingshai halor ki jingsahkut bad ka jingbym iaid bha ki skhim, namar ngi iohi ba la iaid ki bnai ki sngi bad la jan kut u snem, hynrei ngim shym iohi kino kino ki dak ki shin ne kino kino ki kam ba kin iaid,” ong u bah Titoss.

Katkum ka jingong u bah Titoss, na ka liang u CEM ula pynshai ba kane ka dei namar ba don ka jingthut ha ki kor ki bor treikam bad kyrmen ba ha kine ki sngi, yn sa lah ban pyntreikam noh ia kane namar ba mynta la siew lyngba ki online ia baroh ki skhim jong ka 15th Finance Commission. Ha kajuh ka por, ki MDC ka liangpyrshah ki la pynsngew ruh halor ka jingpynslem ban siew ia ki Bill kiba la dap da ki bnai bad da ki snem.“ Ngi pynsngew sha u CEM ba un shimkhia ban pynkloi ban siew noh ia ki Bill ki bym donkam ban iaid lyngba ka jingsiew Online,” ula ong. Ha kane ka jingiakynduh, ki MDC ka liang pyrshah ki la pan jingshai ruh halor ka 2nd Installment jong ka Tied bad Untied skhim 2021-22.“Naduh ka samoi jong ka EC ba la dep baroh ki MDC ki la dep phah ia ka jingtyrwa, kaba mut ba kaba sah mynta ka long ba ia kine ki skhim yn pyntrei da kane ka EC kaba mynta, hynrei kine ruh haduh mynta ki sah ha ka umdum. Ia kine ki skhim ki JE ki la leit thew leit woh haduh ha jaka hynrei ka jingbym lah ban pyntreikam ia ka skhim ka la ktah ia ki MDC,” ula ong.

Halor kane, na ka liang u CEM ula pynshai ba kim pat ioh ia ka pisa na Delhi bad um shym la lah ban ai kano kano ka jingkular.Shuh shuh nalor kine, ki la pynsngew ruh halor ka jingbym ioh ki konstiwensi kiba dei ban ioh ia ka Urban scheme, ka skhim ialehkai (Sports Scheme), ka pisa kaba dei ban pyllut na bynta ka lariti, ka skhim ban iarap ha ka pule puthi. U bah Titoss ula ong ba ki MDC man u snem ki ju ioh ia ka skhim ban ai jingiarap sha ar tylli ki skul ki bym ju ioh ia ka jingiarap na ka sorkar, hynrei mynta kaba sngew lyngngoh ka long ba haduh mynta kim pat ioh pdiang ia ka shithi, watla ia kane ka skhim la dep wanrah ha ka mang tyngka ha u bnai Jylliew.