Ka sorkar kan ai jingiarap T.18 klur ia ki nongsengkam lajong

U Myntri Rangbah ka jylla hynne ka sngi ula plie paidbah ia ka Rural Preneur, 2025 ba nyngkong ha jylla kum shibynta ban kyntiew ia ki nongseng kam lajong. Ia kane ka prokram la pynlong ha u Soso Tham Auditorium, ki nongseng kam lajong na kylleng ki jaka jong ki District ka jylla ki la wan ban iashim bynta ha kane sngi ban pyninam ia ki tiar ba ki shna bad ki jingbam tynrai.U Myntri Rangbah u Conrad K Sangma haba kren ha kane ka sngi ula ong, ka sorkar kan nang pyniar shuh shuh ia ka jingtreikam ban ai jingkyrshan sha baroh ki nongseng kam lajong ha ki 52 tylli ki block ha ka jylla lyngba ka PRIME Rural program.

U Conrad K. Sangma ula kyntu ia ki nongseng kam ka jylla ban bteng ia ka kam wat la ki mad ia ki jingeh bad ula ban jur ba bun ki kam ki la pulom noh ym namar ka jingtlot ha ka rukom pyrkhat pyrdain hynrei ka dei namar ba ki briew ki la kynran dien kloi noh.“Bun ki nongseng kam k ila pulom noh ym namar ka rukom pyrkhat kaba long namar ba ki sangeh ban pyrshang. Lada phi ngeit ha ka rukom pyrkhat jong phi, iaid shakhmat. Ngi ngin ieng ryngkat bad phi” ong u Conrad Sangma.Ula kular ba ka sorkar kan ai jingiarap haduh T.18 klur sha baroh ki nongseng kam lajong khnang ba kin lah ban pynbiang ia ki jingdonkam bad ban pynsuk ia ka rukom treikam jong ki kynthup naduh ki bording sngi bad kiwei de ki kor treikam.

Ha kane ka sngi, u Myntri Rangbah ula pyllait shwa ia ka pisa kaba T.3.4 klur kum ka jingai jingkyrshan ia ki nongseng kam lajong ha kylleng ki jaka jong ka jylla.Hashwa kane, u Conrad ula leit jngoh ia baroh ki dukan ba la buh da ki nongseng kam lajong na kylleng ki jaka jong ka thain Jaintia, Khasi bad Garo Hills.Lyngba kane ka Rural Preneur, kan plie lad ia ka jylla Meghalaya ban long kum kawei na ki nongsain dur ha ka ri bad kan sa wanrah ka jingkylla ruh ia ka jylla.