Iakynduh ki Sengbhalang na Garo ia u Lat, kyntu pynkylla kyndon ilekshon ki kyrtong bad nongthep vote ki dei ban don ST

Ki kynhun sengbhalang bapher bapher na Rilum Garo hynne ka sngi ki la iakynduh ia u Lat ka jylla u Chandrashekhar H. Vijayashankar ha Lok Bhavan, ban kyntu ban pynkylla ia ki kyndon ileskhon ha Garo Hills Autonomous District Council (GHADC) ha kaba kiba nongiakhun bad ki nongthep vote ki dei ban don ia ka syrnod Scheduled Tribe (ST). Kine ki kynhun kiba kynthup ka Garo Students’ Union (GSU), Federation of Khasi Jaintia and Garo People (FKJGP), Association for Democracy and Empowerment (ADE) bad Nangrimingin A’chik Dol (NAD), ki la aiti ruh ia ka dorkhas ban pynsngew ia ka jingsngewkhia halor ka jingshim bynta ki bym dei riewlum ha ka ilekshon sha Garo Hills Autonomous District Council.

U President ka GSU u Tengsak Gabil Momin, ula ong ba ki la kyntu ia u Lat ban pynkylla ruh ia ka kyndon ba 128  jong ka ADC Rules, 1958, bad ka Paragraph 12(A) jong ka riti synshar ban iada bad pynneh ia ka hok jong ki paidbah riewlum.“Ngi la kyntu ia u Lat ka jylla ba kiba iakhun ia ka ilekshon MDC sha ka GHADC kin dei tang kiba don ka syrnod Schedule Tribe certificate bad kawei pat ban pynkylla ia ka rules 128 da kaba bsuh ia ka kyndon ba tang ki Garo kin ioh ban ialeh ilekshon MDC bad ban thep vote ha district council,” ong u President ka GSU.Ula ong ba na ka liang u Lat ka jylla ula shah shkor bha ia ka jingpynsngew jongki bad ula ai jingmut ba lada long kan bha ban pyntreikam ruh ia ka Special Intensive Revision (SIR) ban tehlakam ia ka jingioh rung nongthep vote ki bym dei trai ri.

U Momin ula bynrap ba ia kane ka mat, ki ladep rah sha  Myntri Rangbah u Conrad K. Sangma. Ha kajuh ka por, ula khublei ruh ia ki paidbah paralok riewlum Khasi bad Jaintia, kiba la kyrshan ia ki ha ka jingiakhih jong ki.