Iakynduh u Conrad ia u Myntri Sorkar Pdeng, dawa pynjlan eksamin CUET ia ki samla Meghalaya

U Myntri Rangbah ka Jylla Conrad K Sangma, ula phah da ka shithi sha u Myntri ka Pule Puthi jong ka Sorkar Pdeng u Dharmendra Pradhan ha kaba ula kyrpad ban tuklar lem mardor halor ka jingshah pynngat ki samla pule ka jylla ban leit thoh ia ka eksamin Common University Entrance Test (CUET) (UG), 2025 sha kiwei pat ki jylla jong ka ri India. Katkum ka shithi kaba la phah da u Myntri Rangbah ka jylla ula pynpaw ia ka jingsngewkhia halor ka jingbuh ha ka jingeh kaba khraw ia ki samla pule ka jylla Meghalaya halor ka jingbym biang ki jaka thoh ia ka eksamin CUET hapoh ka jylla. “Bun bah ki samla pule kila jied ban ialeh ia ka eksam ha Meghalaya khamtam eh ha ka nongbah Shillong, hynrei kila shah pynngat ha ki Centre ne jaka thoh eksam sha ki jaka kiba jngai bah kum ha Jorhat, Dibrugarh, Mizoram, Nagaland bad Kolkata. Kane ka jingleh, kala buh ia ka jingkit kaba khia ia kiba bun ki samla pule khamtam eh ia kito kiba wan na ki longiing kiba duk, kiba la shah pynbor ban pynlut pynsep ha kaba iadei bad ka bai leit bai wan bad ka jaka sah. Ha kiba bun ki khep, kine ki jinglut jingsep kila long palat pud ban ia ka bor ka jongki” la pynpaw u Conrad ha ka shithi kaba la phah hynin ka sngi Saitjain.

Ula ong, kane kan lam ym tang sha ka jingpynthud ia ka jingpynkhreh ka jongki samla pule ia ka pule puthi ka jongki hynrei kan lam ruh sha kata ka rukom pyrkhat ba la shu pynbor ia ki ban iehnoh ia katei ka jingialeh ia ka eksamin. Kane ka jingjia kala iai mih wat hapdeng ki jingiai kyrpad kiba la bunsien bad ha ki snem kiba la leit, la ioh ia ki jingkular halor ka jingdon pahuh ia ki jaka thoh eksam hapoh jong ka jylla. U Myntri Rangbah ula pynpaw ruh, ba ka long kongsan ban pyntip ba ka Sorkar Meghalaya kala ai ka jingkyrshan kaba pura ia ka National Testing Agency (NTA) da kaba ithuh ia ki Centre kiba kongsan bad la ai ruh ia ka jingtyrwa ban ai ia ka jingiatreilang da baroh ki bor kiba dei khmih jongka Sorkar Meghalaya. “Ngi la thaw ruh ia ka State Level Committee ryngkat bad ki District Level Committee, ban shimkhia ban lah ban pyniaid beit pyniaid ryntih ia ki eksam jongka NTA hapoh ka Jylla bad wat hapdeng kine ki jingpyrshang, kane ka rukom pynngat ia ki jaka thoh eksam kadei ka dawbah kaba la pynmih ia ka jingeh bad jingjynjar” la ong u Conrad.

 “Halor jong kitei ki daw kiba la kdew haneng, nga kyntu jur ba phin tuklar mardor bad ban bthah ia ka National Testing Agency (NTA) ba kan bishar biang bad ban pynngat thoh ia ka eksam Common University Entrance Test (CUET) (UG), 2025 ia ki samla pule ka Meghalaya hapoh ka Jylla hi bad ban mynjur ha kaban pynjlan lane pynkynriah shuwa ia ka eksamin na ka bynta ki samla pule ka Meghalaya mynta u snem tad haduh bala pynthikna ba la pynbiang ia ki jingdonkam baroh kiba iadei bad ki jaka ialeh eksamin” la pynpaw u Conrad. Nalor kane ula ong ruh, ba kane ka jingkyrpad kadei namar ka jingdonkam kyrkieh jong ki samla pule bad ula pynpaw ba u shaniah skhem ha u Myntri ka Sorkar Pdeng ba yn shimkhia thikna ia kane ka kam.