Iakynduh u Conrad ia u Myntri Sorkar Pdeng, dawa pynjlan eksamin CUET ia ki samla Meghalaya

Ka Federation of Khasi-Jaintia & Garo People (FKJGP), South West Khasi Hills district ha ka Sngi Saitjain ka la khang tala noh ia ka Umjarain Sub-Centre, kaba hap hapoh Mawkyrwat Block ha ka jingiadonlang u Secretary Shnong jong ka Shnong Umjarain, u Bah C. Lyngkhoi bad kane kan ktah haduh katta katta ia ki paitbah katei ka thain khamtam ki longkmie ba armet bad ki khyllung kiba shaniah ha kane ka Centre ban ioh jingsumar. Ka FKJGP ka la shim ia kane ka rai kaba tyngeh hadien ba ka tnat ka Koit ka Khiah kam shym la lah ban pynurlong ia ka jingdawa jong ka seng ban thungkam pura noh ia ka trai jaka jong kane ka Sub Centre, ka Kong Shidalin Lyngkhoi hapoh ar taiew.

U Information Secretary ka FKJGP South West Khasi Hills district, u bah Enbor Syiemiong u la iathuh ba katkum ka jingiateh soskular ba la iasoi bad ka tnat ka Koit ka Khiah ha u snem 2010, ka kong Shidalin ka la mynjur ban ai sngewbha ia ka jaka jong ka na ka bynta ban tei ia katei ka sub-centre bad ka tnat Ka Koit Ka Khiah pat ka la kular ban ai kam sorkar ia ka, hynrei kaba sngewsih pat ka long ba ka la shu thung ia ka tang kum ka nongtrei ba shipor mynta la palat shiphew snem.“Kane ka centre kan khang naduh mynta ka sngi tad haduh ba ka tnat ka Koit ka Khiah kan da lah ban shim ia ka rai ban thung ia ka trai jaka jong kane ka Sub Centre kum u nongtrei ba pura jong ka Sorkar bad baroh ki jingshakri jong kane ka jaka ai jingsumar ia ki paidbah kin sangeh noh”, la ong u bah Enbor.

U Secretary ka shnong Umjarain, u Bah C. Lyngkhoi u la pynpaw ka jingsngewkhia halor ka jinglong jingman ha kaba la hap ban khangtala noh ia kane ka jaka sumar, kaban sa ktah jur ïa ki paitbah jong ka shnong Umjarain bad kiwei de ki shnong kiba hap hapoh ka Umjarain Sub Centre. Hynrei u la ong ba ka dorbar Shnong kan ym khanglad ia kane ka jingleh jong ka FKJGP namar ba ka tnat ka Koit ka Khiah ruh ka la leh klet ban burom ia ka jingiateh soskular ba la iasoi bad ka trai jaka naduh u snem 2010. Kumta, u la kyntu ruh ia ka tnat Ka Koit Ka Khiah ba kan pynbeit mardor ia kane ka jingeh khnang ba kan ym ktah ia ki paidbah ka shnong bad ka thain.