Ka CM Guidebook ka pynhiar dor ia ka pule ha Jylla: Ardent

U President ka Voice of the People Party (VPP) u bah Ardent M Basaiawmoit ula ong ba ka jingthmu jong ka sorkar jylla ban wanrah ia ka CM Impact Guidebook ka long tang ban pynhiar dor ia ka pule puthi ha ka jylla. Haba kren sha ki lad pathai khubor, u bah Ardent ula ong ba ka seng naduh ka sngi nyngkong hi kam sngew iahap ia ka jingwanrah ka sorkar ia ka CM Impact Guidebook. U bah Ardent ula ong ba watla ka jingpas bun ki khynnah ha kane ka eksam Secondary School Leaving Certificate (SSLC) ka kiew hynrei ki khynnah mynta ki iakynduh jingeh ban ioh klas. “Ki kolej kim lah ban pdiang ia baroh ki khynnah ba pas ia ka eksam SSLC mynta u snem,” ong u bah Ardent.

U nongialam ka VPP ula ong ba ym dei ban pynleit jingmut tang ha ka pas percentage ki khynnah hynrei ki dei ban peit ia ka jingioh jinghikai ki khynnah. “Ka CM Impact guide book ka dei ka jingleh kaba bakla tam. Kam long kaba biang ban shu pass khlem ka rukom hikai kaba biang bad hap ban pyrkhat ia ka lawei ki khynnah ki ban iakhun ia ki eksamin ym tang hangne ha jylla hynrei shabar ruh,” ula ong.

Lah ban kdew ba ka jingdon ki khynnah kiba pass ha kane ka eksamin matrik mynta u snem ka la kiew syndet sha ka 83 percent tam bad ka daw ka dei na ka jingwanrah ka sorkar ia ka CM Impact Guidebook ban iarap ia ki khynnah ban pass, ha kaba ka la don shibun ka jingshah kynthoh ia ka sorkar ia kane ka rukom leh, kaba lah ban pynsniew dur ia ka pule puthi namar ba kwah tang ban pass katba ka jinglong ka pule puthi kan nang hiar.