Ïamir jingmut ban pynkhreh ïa ka Mang Tyngka 2025-26

Shillong, Rymphang : U Myntri Rangbah ka jylla Meghalaya u Conrad K. Sangma, hynne ka sngi ula iamir jingmut bad ki riewshemphang ka jylla ha kaba iadei bad ka jingpynkhreh ia ka Mang Tyngka jong ka jylla na ka bynta u snem 2025-26 ban pyntyllun ia ki kam bad ia ki prokram jong ka sorkar ban kyntiew ia ka ioh ka kot bad iaka roi ka par jong ka jylla.
Ia kne ka jingialang la pyniaid da u Myntri Rangbah uba khmih lang ia ka Pla Tyngka jong ka jylla ha kaba la ioh ruh ia ka jingbatai shaphang ka Mang Tyngka na u Commissioner bad Secretary ka tnad pla tyngka u Dr. Vijay Kumar D.
Uwei na ki nongiashim bynta ha kane ka jingiamir jingmut ula ong ba ym ju poi pyrkhat ba ka sorkar kan pyndonbynta lang ia ki paidbah ha ka jingpynkhreh ia ka mang tyngka bad kane kadei ka sien kaba nyngkong eh ba kila ioh ia ka jingshai bad jingpynsngewthuh halor ka rukom pynkhreh ia ka mang tyngka bad ha kano ka rukom la mang pisa bad pyntreikam ia ki kam bad ia ki prokram jong ka sorkar.
Ha kane ka jingiamir jingmut la pynleit jingmut halor ka jingpynkiew ia ka khajna, ka jingpyniaid ia ka pisa tyngka bad ka jingiashim bynta jong ki nongshong shnong ha ka jingpynkhreh ia ka mang tyngka.
U Myntri Rangbah ula pynpaw ba ka long kaba donkam ia ki paidbah ban iashimbynta lang namar ba ka mang tyngka ka dei na ka bynta ki nongrep, ki nongseng kam seng jam bad baroh ki kynhun bapher bapher.
“Ngi lah ban ym kynthup lut mardor ia ki jingai jingmut, hynrei ngin kynthup katba ngi nang iaid shakhmat. Ka jingai jingmut na ki paidbah ka lah ban long kaba lah ban wanrah ia ki jingkylla,” ong u Conrad.
U Myntri Rangbah ula ai khublei ruh ïa ka jingpyndonkam bha ïa ka pisa na ka bynta ka jingkiew ka ïoh ka kot jong ka jylla bad ula ong, “Ka pisa ka don ha Delhi, hynrei ka jinglah jong ngi ban shim bad pyntreikam hok ïa ka, ka long kaba kongsan, katba ngi dang ïakren bad ka Sorkar India ban bei tyngka na ka bynta ka bha ka miat jong ngi bad ki sienjam ba ka jylla ka shim ban wanrah ia ka roi ka par. Ka jingkiew ka Meghalaya ka kot 16.2%, kaba palat ia ka jingkiew jong ka ri baroh kawei bad kane ka pyni ia ka jingkiew”.
Ula iathuh ruh ba ka jinglum khajna kala kiew ar shah ha ki hynriew snem—na ka T.1,450 klur sha ka T.3,217 klur bad ula ong, ba tang na ka khajna kyiad ka la kiew na ka T.199 klur ha u snem 2018 sha ka T.458 klur ha u snem mang tyngka ba la dep bad la khmih lynti ba mynta u snem kan palat ïa ka T.500 klur.
U Myntri Rangbah ula pynkynmaw ba ka jingkular jong ka sorkar ban ialeh ban pynkhlaiñ ïa ka jingpule ba kham shalor bad ban kyntiew kyrdan ïa ki skul bad ula ong ba ki jingbei tyngka kiba dang ïaid shakhmat ha ki jingtei jong ki skul sorkar bad ka jingseng ïa ki 23 tylli ki kolej paidbah ba thymmai ban kyntiew ïa ka pule puthi.