Ka Sorkar Meghalaya hynne ka sngi ka la iasoi ia ka Letter of Intent (LoI) bad ka Starlink India lyngba ka Video Conferencing ha kaba la wan ban sakhi da u Myntri Rangbah ka jylla u Conrad K. Sangma bad u Myntri ka pule puthi u Bah Lahkmen Rymbui.
Ha kane ka jingiasoi la iadonlang ruh u Sampath Kumar, Additional Chief Secretary and Development Commissioner ka Sorkar Meghalaya bad kiwei ki heh ophisar ka jylla, ki nongmihkhmat na ka Starlink kiba la iashimbynta lyngba ka Video Conferencing kiba kynthup ia ka Gwynne Shotwell, President & COO, SpaceX, Lauren Dreyer, Vice President, Starlink Business Operations, Prabhakar Jayakumar, Country Head, Starlink India bad u Parnil Urdhwareshe, Director ka Starlink India.
Kane ka jingthmu ka dei kaba iaid ryngkat bad ka jingiohi jngai ka Sorkar Meghalaya ban kynjoh ka ioh ka kot kaba 10 Billion US Dollar hapoh u snem 2028, ha kaba ka jingpyniasoh ia ki lad lyngba ka kor Digital kaban shakri kum ka bynta kaba kongsan na ka bynta ka jingroi kaba salonsar bad ka jingkiew jong ka ioh ka kot.
Haba kren ha ka jingialang u Conrad Sangma ula pynpaw ia ka jingiaid lynti ka jylla bad ia ka bynta kaba kongsan jong ki lad pyniasoh kiba ialam shaphrang ia ka jingkiew ka jylla bad ula ong, “Ha kine ki 8 snem kiba la dep, ngi lah pynleit jingmut ha kaban tei ia ki jingtei bapher, ban tei ia ka sap ka phong bad ban pynshlur ban pyndonkam ia ki kor teknoloji ban wanrah ia ka jingiadei kaba iajan hapdeng ka sorkar bad ki paitbah”.
Ula ong “Ka jingpyniar ia ki lad iasoh haduh ki bynta kiba kut kadei kaba iai bteng ban mad ia ka jingeh. Ngi lah dep ban buh ia ki Optical Fibre ban poi shaduh ki jaka kiba don sha jngai ban poi sha ki public health centre, sub-centre, skul bad ki shnong ki thaw, hynrei kane kadei kaba bam bha ia ka por bad ka por ka long kaba kordor bha”.
Ula pynpaw ia ka jingngeit kaba skhem ba kane ka sienjam kan wanrah ia ka jingkylla bad kane ka lad pyniasoh lyngba ka Starlink kan wanrah ia ka jingkylla bad lada ka iarap ban iada wat tang ia kawei ka jingim ruh ban ioh ia ka lad kaba bha ha kaban ioh jingsumar, ne ka plie lad ba wat tang iwei i heprit in ioh pdiang ia ka pule puthi kaba paka ne kyntiew ia ka kamai kajih jong uwei u nongrep ruh, kan long ka jingjop kaba don jingmut.
U Conrad ula ban jur, ba ka thong kaba hakhmat eh ka long ba dei ban pynpoi ia kane ka teknoloji sha ki jaka kiba don ha kyndong kynshrot bad sha ki jaka kiba la shah iehbeiñ bad ula pynpaw ia ka jingangnud ba kane ka jingiatreilang kan wanrah ia ka jingkylla bad dei ban pyntreikam noh mardor.