Iathir ka CPGSAS ban kyntiew ia ki nongrep da ki kor ki bor ka juk stad mynta

Ka College Post Graduate Studies in Agricultural Sciences (CPGSAS), Umiam hynne ka sngi ka la sdang ïa ka prokram ba ar sngi ban bishar bad ia thir sani halor ki lad ki lynti ban kyntiew ia ka rep ka riang ha ka thain Shatei Lam Mihngi ïa kaba la pynlong ha Auditorium ka College Post Graduate Studies Agricultural Sciences, Umiam.

Kane ka prokram ka thmu ban wanrah ia ki jingpynkylla thymmai ha ka rukom ai jinghikai bad ka jingai jingmut sha ki nongrep, da kaba pyndonkam ia ki kor ki bor stad ka juk mynta.

Ia kane ka prokram la tip ha ka ktien phareng kum ka “Consultative Workshop on Transforming Agricultural Extension Education and Advisory Service System in North-East India: Policy Perspectives for Viksit Bharat 2047. Kane ka workshop ka thmu ban wanrah ia ka jingïasyllok hapdeng ki riew shemphang, ki nongwad bniah, ki nonghikai bad ki ophisar sorkar halor ki rukom treikam ban pynbha ia ka rukom rep ka riang ha ka thain.

Ia kane ka prokram ba ar sngi la kyrshan da ka Central Agricultural University (CAU), Imphal, ha ryngkat ka jingïatreilang bad ka ICAR–ATARI Zone VI, Guwahati bad ka ICAR–ATARI Zone VII, Umiam.

Ha kane ka workshop, ki riew shemphang na kiba bun ki jylla ka thain Shatei Lam Mihngi kin sa ïa thir sani halor ki buit thymmai ban pynkhlain ia ka rep ka riang, kynthup ia ka jingpyndonkam ia ki kor Digital bad ka Artificial Intelligence (AI) ban pynsted bad pynjanai ia ka jingai jingmut sha ki nongrep. La khmih lynti ba kine ki jingthmu kin iarap ban saphriang ïaki jingtip sha ki nongrep halor ka suinbneng, ka jingthung jingtep, bad ruh ka jingsumar ia ki jingthung jingtep.

Nalor kata, kin ia bishar ruh halor ki lad ban pynbha ia ka iew ka hat jong ki mar rep khnang ba ki nongrep kin ioh ia ka dor kaba biang bad ban kyntiew ia ka ioh ka kot jong ki. Ki riew shemphang kin batai ruh halor ka jingdonkam ban pynkhlain ia ka jingai jinghikai sha ki samla kiba kwah ban rung sha ka kam rep ka riang.

La ong ruh ba ka jingïasyllok ha kane ka workshop kan wanrah ia ki jingai jingmut sha ki paidbah bad ban wan rah ïaki polisi kiba lah ban iarap ia ka jylla bad ka ri hi baroh kawei ban pynurlong ia ka thong Viksit Bharat 2047, kaba thmu ban pynlong ia ka ri India kum ka ri kaba kiew shaphrang ha baroh ki liang ha u snem 2047.

La khmih lynti ba ka jingïakren bad jingïasyllok ha kine ki ar sngi kan sa wanrah ia ki jingai jingmut kiba khlain ban pynbha ia ka rukom rep ka riang ha ka thain Shatei Lam Mihngi, bad ban wanrah ruh ia ka jingkiew ha ka ioh ka kot jong ki nongrep.